Pengingat Lama ari Warrant Officer (WO II) Tom anak Dap - Cherita 25

Para 7 Appendix A No. S 65 The Sarawak Rangers Ordinance, 1960

Leave

Members will be entitled to 30 days' leave in Sarawak in respect of each completed year's service with the British Army or two and half days' leave for each completed month of such service. During such leave, ration allowence will be paid in lieu of ration in kind.

Enti nitih ke atur ti ditulis ba The Sarawak Rangers Ordinance, 1960 baka ke dipandang ba atas, soldadu Sarawak Rangers dikemendarka kemisi pengalama 30 hari dalam setahun. Maya ngambi kemisi tu, raban soldadu Sarawak Rangers diberi elaun dalam mata duit kena nganti ration ti disedia ngagai soldadu ti diau ba kem.

HQ Movement Centre Fort Canning Singapore, sebengkah palan ti ngatur pengawa mindah kin kitu bekenaka kapal ngagai menua bukai baka menua Hong Kong, United Kingdom enggau sekeda menua bukai agi. Palan tu mega bisi ngatur pemindah raban soldadu Sarawak Rangers lebuh kemisi pulai ke Sarawak bekena ke perengka pengangkut baka kapal dagang.

Pengingat Lama ari Warrant Officer (WO II) Tom anak Dap - Cherita 26

RASC WING F.E.T.C.

Royal Army Supply Corp Wing, Far East Training Centre tauka RASC Wing F.E.T.C. bepalan ba Nee Soon Barrack, Mandai Road, Singapore. Palan tu suba suah ngatur pengawa ngelatih bala soldadu kelebih agi soldadu ti dipegai sereta dikuasa ulih perintah British baka raban soldadu Sarawak Rangers. Mayuh macham kursus bisi di atur ba palan tu maya nya baka kursus Motor Transport, Clerk, Fire Duties, First Aid Instructor, CQMS Duties, Wireless Operator (Signaler), Cook sereta mayuh macham agi.

Reporting Centre tau ka palan alai pelatih ngelapor sereta nyerah dokumen.

Terubah aku datai ba barrack tu iya nya bulan lapan tahun 1959 maya baru nyadi soldadu (peda Cherita 9). Barracks tu suah endur alai soldadu transit tau ka bemalam enda lama lebuh deka mindah ke bukai.

Pengingat Lama ari Warrant Officer (WO II) Tom anak Dap - Cherita 25

Tampung ari Cherita 24

Datai ba Pasar Sibu, aku enggau dua iku pegawai ari raban bansa Ribai iyanya Tuan OC Major D.L. Bruce Merrie, MC (Officer Comanding Sarawak Rangers) enggau Capt. Mike Bolton diau bemalam ba goverment rest house beantika kapal ke bisi bekejang ke Singapore.

Sekumbang diau ba Pasar Sibu, aku nadai kala berasai sunyi laban bisi kaban ari Rumah Panjai Samu Paku Saribas iyanya Matthew Sumbang ti gawa ba Pos & Telegraph (P&T)Sibu ti selalu begulai enggau aku nyiting malam berandau ngelantangka ati. Lebuh maya nya, palan ke bisi merindag ati ti dikerinduka urang bujang mina night club aja. Dia meh bala berandau enggau pangan diri ngirup ai bir sambil ninga lagu ari penanyi ke bisi merindang bala temuai ke datai. Mayuh macham lagu bisi disada bala penanyi lebuh maya nya. Tang ketebal agi mayuh lagu ari raban bansa China tauka Mendarin. Kelimpah ari ninga sada lagu ari penanyi, mayuh macham lagu mega ulih didinga ari jukebox. Jukebox tu iyanya sebengkah perengka bebayar ke ulih mainka lagu ke udah dipilih pengudah duit sen ditepuk ngagai mesin nya. Tebilang ba tahun 60an.

Pengingat Lama ari Warrant Officer (WO II) Tom anak Dap - Cherita 24

Tuan OC Major D.L Bruce Merrie, MC ukai semina rinduka soldadu Iban Sarawak Rangers tauka nyaga penglikun sereta pendiau sida iya enggau bini anak sida iya, iya mega rinduka main asal enggau adat raban bansa kitai Iban. Bulan April 1961, udah pengawa bepilihka soldadu tembu diatur, aku bisi dibai begulai enggau iya sereta siku agi pegawai soldadu Ribai iyanya Capt. M. Bolton bejalai ngusung rumah-rumah panjai kitai Iban ba Bagi Kedua enggau Bagi Ketiga, Sarawak. 

Sebedau berengkah mupuk bejalai, dia kami dibai Sgt. Ningkan anak Kasau ngagai rumah panjai iya di Pudai. (Diatu menuanya udah nadai agi, ampuh gasak ke tekat Batang Ai). Pemanah adat bansa kitai, ukai semina enggau bala ke beserimbai pendiau, kitai mega bebasa amat ngagai temuai. Dia kami disambut bala Iban Rumah Panjai Pudai enggau piring lalu bedara labanka rindu meda penatai bala kami, kelebih agi bala kaban ari raban bansa  Ribai.

Pengingat Lama ari Warrant Officer (WO II) Tom anak Dap - Cherita 23

Urung tahun 1961, aku bisi dipinta begulai enggau raban soldadu Sarawak Rangers ti begigaka urang di menua Sarawak ke deka direkrut nyadi soldadu. Pengawa begigaka urang tu endang digaga nyiting tahun, suah agi ba ujung bulan April, laban pengawa kitai Iban ke betanam tupi kelebih agi  baka ngetau padi udah tembu. Nadai kala puntan lebuh begiga ngambi urang ti deka nyadi soldadu.

Bala raban berekrut soldadu Iban Sarawak Rangers maya nya nyengkaum dua iku pegawai soldadu Ribai iyanya Tuan OC Major D.L. Bruce Merrie, MC enggau Capt. Mike Bolton, siku lutor soldadu Ribai iyanya Major Doctor Crowdy, Warant Officer II RQMS Jims Emray, Sgt. Ningkan anak Kasau, enggau tiga iku lain-lain pangkat (NCO) nyengkaum aku empu. Menua ke endur alai berekrutka urang tu endang udah dipilih dulu agi iyanya Kuching, Simanggang enggau Lubok Antu. Nyadi perengka pengangkut maya nya bisi bekenaka long boat tauka perau panjai laban menua Sarawak apin bisi mayuh jalai alun. Datai ba siti-siti menua, dia bala kami betemu enggau Tuan DO sereta tuai-tuai Iban ti udah di tesau bebaika nembiak iya ke deka nyadi soldadu.

Pengingat Lama ari Warrant Officer (WO II) Tom anak Dap - Cherita 22

Bala raban serdadu Iban Sarawak Rangers ti bepalan ba Baird Camp Ulu Tiram suba bisi disediaka perengka pengangkut minibus ti diberi tulung ari Lord Nuffel Trust ti dikena bejalai raun rindu ati ngelantangka diri begulai enggau pangan tauka bini enggau anak ngagai endur bukai ti tau naritka ati ba menua Johore tauka Singapore.

Perengka pengangkut minibus tu dikeluarka Motor Morris Company ti bepalan ba Orchid Road Singapore. Aku sekeda ari bala serdadu Iban Sarawak Rangers ke bisi lesen bebaika perengka pengangkut dipinta nurun ke Orchid Road Singapore ngambi minibus tu lalu dibai ke Baird Camp Ulu Tiram, Johore.

Pengingat Lama ari Warrant Officer (WO II) Tom anak Dap - Cherita 21

Sedili Besar bepalan ba nanga Sungai Sedili nebing Tasik China Selatan adap ke timur laut menua Johore. Urung tahun 1962, bala raban serdadu Sarawak Rangers enggau bini anak bisi kitu bejalai meda pemanah tasik enggau tebing sereta bemain rindu ati enggau bala pangan lalu bemalam ba endur nya bisi datai ngagai tiga hari. Pengawa ke dikumbai rest & recreational ba serdadu tu endang sigi bisi diatur ke ungkup raban serdadu maya nya kelebih agi sida ke bisi bini anak.

Ari Ulu Tiram raban serdadu Sarawak Rangers sereta bini enggau anak dibai ngena trak serdadu nempuh menua Mawai ke bisi ngembuan kampung ti agi jerung nengah jalai tanah mirah sebedau datai ba menua Sedili. Lebuh mansa menua Mawai tu, bisi ga aku mansut ke penemu ngagai bala bukai, nguji minta tanah ba kampung jerung tu ari Sultan Johore kena niri ke rumah panjai ngambika bisi temuda kitai Iban Sarawak Rangers ba menua Johore. Tang penemu tu enda diterima laban kampung jerung ba menua Sarawak agi mayuh, pia mega babas agi bedandang besai bedau diperimba.

Pengingat Lama ari Warrant Officer (WO II) Tom anak Dap - Cherita 20

Ba Baird Camp Ulu Tiram, bisi siti rumah sekula digaga kena bala anak raban serdadu Iban Sarawak Rangers belajar. Rumah sekula tu tembu digaga hujung tahun 1960 sama maya Flat Married Quarters tembu. Rumah sekula tu berengkah dikena ari tahun 1960 ngagai 1963.  Pengajar Perpetua Lika anak Irok tauka Indai Jonathan tauka bini Chif Clerk David anak Jaun bisi kala ngajar ba sekula tu berengkah bulan Jun 1962.

Pengingat Lama ari Warrant Officer (WO II) Tom anak Dap - Cherita 19

Palan endur alai serdadu tauka kem serdadu endang sigi bisi ngebuan rumah endur alai serdadu sereta anak bini sida iya diau. Ba Baird Camp Ulu Tiram, blok endur alai serdadu ke bisi anak bini diau baru tembu digaga urung hujung tahun 1960. Gambar dibaruh tu mandangka kuarters tauka Flat Married Quarters endur alai serdadu ke bisi anak bini diau ba Baird Camp Ulu Tiram.

Pengingat Lama ari Warrant Officer (WO II) Tom anak Dap - Cherita 18

Gambar ba baruh tu diambi ari Baird Camp Ulu Tiram nunga ngagai Kenya Camp Ulu Tiram diambi urung tahun 1961. Kenya Camp tu bisi kala diuan serdadu ari Batalion Gurkha, 40 Commando Royal Marines sereta Royal British Forester.

Pengingat Lama ari Warrant Officer (WO II) Tom anak Dap - Cherita 17

Dewan makai ba Baird Camp Ulu Tiram digaga ari papan sereta ngena atap asbestos cement. Daun penjan dewan makai pan digaga ari papan. Daun penjan tu dibuka tau ke disilak lalu ditungkat ngena kayu baka ke dipandang ba gambar di baruh tu. Gambar ke dudi sekali bisi ngayanka kayu ti nyadi tungkat penjan dipeda ari dalam dewan.

Gambar terubah tu ngayanka dewan makai ba belakang sekali. Ba mua dewan makai tu bisi papan kelai Sarawak Rangers. Lambang Sarawak Rangers tu udah ditusi aku ba Cherita 14. Ba gambar tu aku begulai enggau David anak Jaun sepiak kanan aku serta Wilfred Busu sepiak kiba aku. Gambar tu diambi urung tahun 1961.

Pengingat Lama ari Warrant Officer (WO II) Tom anak Dap - Cherita 16

Kelimpah ari bekawad, belatih nimbak sereta nyadi pengajar, aku mega mangku pengawa nyadi driber kereta serdadu. Aku belajar mai kereta serdadu tu ba Paroi Camp, Port Dickson (peda Cherita 9) maya baru nyadi serdadu . Maya ba Baird Camp, Ulu Tiram, aku mega suah endar mai kereta serdadu ba menoa Johore sereta Singapore, kelebih agi ba pasar besar Johore Baharu enggau Singapore. Semua jalai besai ke di pansa ba Johore enggau Singapore ditemu aku magang maya nya.

Di baruh tu ngayan ke Land Rover ti nyadi kereta serdadu ke dibai aku maya ba Baird Camp, Ulu Tiram. Gambar tu diambi urung tahun 1961 begulai enggau Lt. Tomlow anak Isa.

Pengingat Lama ari Warrant Officer (WO II) Tom anak Dap - Cherita 15

Sarawak Rangers Uniform

Aku nyadi serdadu suba berengkah ari 7 Ogos 1959 (peda Cherita 9). Maya nya serdadu Sarawak Rangers agi dikumbai siti Kompeni serdadu penyidi. Berengkah ari 1 April 1960, serdadu Sarawak Rangers nyadi siti Unit ti dikumbai Special Tracking Unit ti dipegai sereta dikuasa oleh serdadu British (peda Cherita 13). Aku maya nya pan ngambi sain baru begulai enggau Unit ke baru ditumbuh nya.

Dua iti gambar di baruh tu diambi dalam tahun 1959 sereta dalam tahun 1961.

900928 Pte Tom anak Dap SWK R - Tahun 1959

Pengingat Lama ari Warrant Officer (WO II) Tom anak Dap - Cherita 14

The Sarawak Rangers Ordinance, 1960

Sarawak Rangers ditumboh ngena atur ti dipansut ari Sarawak Chief Secretary ti nitih ke perintah ari Gabenor Sarawak. Atur tu bisi ditulis ba Notis Lumor S 65 The Sarawak Rangers Ordinance, 1960, The Sarawak Rangers (Far East Land Forces) Unit Regulations, 1960 (Made under section 24) ke dipansut ba Kuching kena hari Lima, 25 Mac 1960.

Pengingat Lama ari Warrant Officer (WO II) Tom anak Dap - Cherita 13

Sarawak Rangers (Far East Land Forces)

Kena 31 Ogos 1957, perintah Malaya buleh Mardeka ari Perintah British. Lalu maya nya pengachau komunis nyau kurang agi. Kenyau arinya, siti siti nengeri di menoa Malaya nyau mansang likun nadai pengachau agi lalu semua pengawa ke besekat udah di kemaduka.

Bulan Marc 1960, Sarawak Rangers pindah ari Port Dikson ngagai Baird Camp Ulu Tiram laban deka numboh siti unit ti dikumbai Special Tracking Unit dipegai sereta dikuasa ulih serdadu British. Unit mit tu tau dikumbai unit pemadu bepetemu dalam pengawa nyidi munsuh ba babas lalu tau dikena ba sebarang alai menua ba dunya enti sema digerah serdadu British. Unit tu mega dikumbai Sarawak Rangers (Far East Land Forces) dipejadika kena 1 April 1960 nitih atur The Sarawak Rangers Ordinance, 1960, The Sarawak Rangers (Far East Land Forces) Unit Regulations 1960 (Made Under Section 24). Berengkah arinya, aku lalu ngena lumor serdadu ti baru iyanya MYA 18195047 ti meri servis lalu dipegai Perintah Queen ari United Kingdom.

Pengingat Lama ari Warrant Officer (WO II) Tom anak Dap - Cherita 12

Pindah ka Baird Camp Ulu Tiram

Kena bulan 3 1960 kami duai Pte. Manja dipindah ngagai Kem Ulu Tiram Johore Bahru begulai enggau Sarawak Rangers ti benung sama pindah ari Kem Port Dickson ngagai kem nya. Kem ke alai bala Sarawak Rangers bepalan ba Ulu Tiram nya diberi nama Baird Camp ngangkatka nama Lt. Col. Baird ti terubah iya nyadi Ketuai Kepala (CO) Sarawak Rangers. Ba alai endur ke baru tu, Sarawak Rangers dijadika siti unit ti di kumbai Special Tracking Unit dipegai sereta diperintah ulih Serdadu British. Sida tu tadi di atur ngagai tiga iti platun ti mai ukoi penyidi enggau perengka wireless kena bejaku kin kia enggau pangan diri.

Gambar ke dirintai ba baruh tu mandang ke gaya pendiau Baird Camp di ambi urung tahun 1960 an.

Gambar Kuarters Kelamin

Pengingat Lama ari Warrant Officer (WO II) Tom anak Dap - Cherita 11

Hari Terbuka Kem Paroi Disember 1959

Kem Paroi bisi kala ngaga pengerami hari terbuka kena ngerami bala serdadu serta bini enggau anak serdadu kelebih agi serdadu ke dikumbai Malaya Other Ranks. Maya pengerami nya, mayuh macham pengawa bisi diatur baka mandangke bilun serdadu ke bisi meri servis nyaga penglikun di Malaya. Dibaruh tu dirintai gambar ke diambi ngayanke bilun single pioneer serta twin pioneer ke bisi di Kem Paroi.

Pengingat Lama ari Warrant Officer (WO II) Tom anak Dap - Cherita 10

Tampung ari Cherita 9

Nyadi Driber Serdadu

Kami training nyadi serdadu ba Kem Port Dickson bisi manggai ngagai 2 bulan berengkah ari bulan Lapan ngagai bulan Sembilan 1959. Maya trainingnya, kami diajar bebaris, nembak sereta mayuh macham agi pengawa ke dikerja ke bala serdadu. Tembu training aku enggau siku agi kitai Iban iyanya Pte. Manja anak Kendawang ari menua Kanowit dianjung ke 69 Coy Royal Army Supply Corp. (69 Coy R.A.S.C.) bepalan ba Kem Paroi, Seremban, Nengeri Sembilan. Ba kem nya kami duai tu tadi diberi kursus mai kereta serdadu. Kursus tu berengkah ari bulan Sepuluh 1959 ngagai bulan Satu 1960. Semua jalai ke bisi ba Nengeri Sembilan maya nya udah ditengah magang. Kami mega bisi diajar subjek mekanik iya subjek ngerepair kereta ngambi ke kami nemu kati deka ngadu ke kereta enti sema jai ba rantau jalai.

Gambar ba baruh tu iyanya gambar aku begulai enggau Pte. Manja anak Kendawang sepiak kanan aku ba kereta Land Rover serdadu. Duduk dalam motorkar Austin dibelakang kami nya iyanya Cpl. Aziz bin Uda ari Kuala Pilah. 

Pengingat Lama ari Warrant Officer (WO II) Tom anak Dap - Cherita 9

Tampung ari Cherita 8

Bekejang ke Kem Port Dickson

Ari kapal MV Rajah Brooke (kapal ke mai kami belayar ari Sarawak ke Singapore) bala kami pan lalu diangkut ngena bot mit ke darat lalu diasuh niki lori serdadu ti mai bala kami ngagai Kem Nee Soon. Maya nya mayuh serdadu ari menua Hong Kong begempuru ba kem nya.

Kem Nee Soon tu iyanya kem dikena bala serdadu British transit. Kem tu bepalan ba Sembawang adap ke utara di menua Singapore.

Pengingat Lama ari Warrant Officer (WO II) Tom anak Dap - Cherita 8

Belayar ke Singapore

Kami pan mupok belayar ke Singapore urung lemai hari pun bulan Ogos 1959. Ba kapal tu aku bekelala enggau Welfred Busu anak Minggat, siku ari kitai iban deka dipadu nyadi officer ba Sarawak Rengers.

Sama enggau kami ba kapal tu, iyanya serdadu Sarawak Rengers ti baru baduk ngereja pengawa ba menua Sarawak.

Gambar atas mandang ke bala serdadu Sarawak Rengers ba dek Kapal MV Rajah Brooke.