Pengingat Lama ari Warrant Officer (WO II) Tom anak Dap - Cherita 25

Para 7 Appendix A No. S 65 The Sarawak Rangers Ordinance, 1960

Leave

Members will be entitled to 30 days' leave in Sarawak in respect of each completed year's service with the British Army or two and half days' leave for each completed month of such service. During such leave, ration allowence will be paid in lieu of ration in kind.

Enti nitih ke atur ti ditulis ba The Sarawak Rangers Ordinance, 1960 baka ke dipandang ba atas, soldadu Sarawak Rangers dikemendarka kemisi pengalama 30 hari dalam setahun. Maya ngambi kemisi tu, raban soldadu Sarawak Rangers diberi elaun dalam mata duit kena nganti ration ti disedia ngagai soldadu ti diau ba kem.

HQ Movement Centre Fort Canning Singapore, sebengkah palan ti ngatur pengawa mindah kin kitu bekenaka kapal ngagai menua bukai baka menua Hong Kong, United Kingdom enggau sekeda menua bukai agi. Palan tu mega bisi ngatur pemindah raban soldadu Sarawak Rangers lebuh kemisi pulai ke Sarawak bekena ke perengka pengangkut baka kapal dagang.

David anak Jaun lebuh nyadi Clark maya nya, suah ngatur pejalai bala raban soldadu Sarawak Rangers enti deka kemisi. Pengawa iya keterubahnya nentuka hari bulan pejalai kapal ke Sarawak ari HQ Movement Centre Fort Canning Singapore. Udah hari bulan ditentuka, surat lalu digaga nuju ngagai Sarawak State Secretary ngambi ka sida iya ngambat lalu ngatur pendiau raban soldadu tu sebedau sida iya pulai ke rumah panjai sida iya. Bala soldadu ti sangkai ba Kuching, sebedau pulai ke rumah panjai, diatur bemalan ba Rumah Dayak tau ka Dayak Rest House ba jalai Satok tunga ngagai jambatan gantung ngimbai Station Petronas ke diatu.

Siku kitai Iban, wakil ari Perintah Sarawak, ti suah ngambat bala raban soldadu Sarawak Rangers lebuh pulai kemisi ari menua Malaya iya nya Joseph Gawing. Iya tu tau disebut liason officer suah ngatur pemulai raban soldadu Sarawak Rangers kelebih agi ngatur perengka pengangkut perintah ti ngemai sida tu ke rumah panjai sida iya.

Bisi dua iti kapal ti suah dikena raban soldadu Sarawak Rangers lebuh kemisi iyanya kapal MV Rajah Brooke engagau Kapal MV Auby. Kapal tu endang udah ditetapka jalai ke ditengah lebuh belayar iyanya baka Kapal MV Rajah Brooke belayar ari Kuching - Singapore - Kuching pia mega kapal MV Auby belayar ari Sibu - Singapore - Sibu. Sida ke diau ba menua pelilih bagi Ke-Satu enggau menua Bagi Ke-Dua baka ari menua Kuching, Simanggang, Lubok Antu, suah bekena ke Kapal MV Rajah Brooke. Sida ke diau ba menua pelilih Bagi Ke-Tiga iyanya baka menua Sibu, Kanowit, Kapit suah bekena ke kapal MV Auby.

Terubah aku kemisi suba iyanya urung tahun 1961, sama enggau bala bukai bekena ke kapal MV Rajah Brooke. Ari Kuching aku tu tadi bekena ke kapal dagang ti belayar ke Sarataok. Datai ba Saratok, terubah pengawa ke dikereja iyanya madahka diri tau ka ngereport diri ngagai Distict Office. Surat pemendar lalu dipandang ngagai sida iya ngambi ke ulih bekena ke perengka pengangkut perintah ti nulung ngajung ngagai rumah panjai. Lebuh maya nya jalai alun endang apin bisi. Nyadi perengka pengangkut ti diesdiaka iyanya bot perintah ti ngajung sampai ngagai penyangkai tau ka pengkalan rumah panjai.

Lebuh mulai ke diri, nuan mega mesti ngereport diri nuan ngagai District Office ngambi ke ulih ngatur pemulai nuan ngagai Kuching. Nuan mega ulih minta ganti tambang minyak ti dikena nganjung nuan ari rumah panjai. Datai di Kuching nuan mega mesti ngerepot diri nuan ngagai Sarawak Secretariat Office ngambi ke pemulai nuan ke Malaya ulih diatur.

Raban soldadu Sarawak Rangers maya kemisi urung tahun 1962. No 2 ari kanan L/Cpl Bandi ak Apat ari Sri Aman.

Gambar di atas diambi aku maya kemisi urung tahun 1962 ba atas kapal MV Rajah Brooke ti baru sangkai ba Sungai Sarawak. Ba belakang soldadu tu bisi mandangka tiang ti melintang dipasang tali ti dikumbai crane dikena nanggung perengka ari kapal ngagai palan penyangkai kapal tau ka ari palan penyankai ngagai kapal. Gari uniform soldadu mesti dikena maya pulai  tau ke mansang ari kemisi.