Pengingat Lama ari Warrant Officer (WO II) Tom anak Dap - Cherita 7

Nyadi Serdadu

Nya alai, lama udah begiga ke pengawa enda ga diterima, aku pan bisi ati deka nurun ke Kuching. Pun bulan lapan tahun 1959, aku bisi nurun ke Kuching laban mai indai Kapok (menyadi aku) ti deka berubat ba Rumah Sakit ba Kuching. Semua perangka baka surat ngetu sekula, surat testimonial sereta surat balas enda diterima kerja ari kompeni dibai sekali maya nurun ke Kuching.

Di Kuching aku bisi betemu enggau (Tan Sri) Gerunsin Lembart, (bala ari menua ti gawa ba Radio Sarawak) madah ke diri deka ngiga pengawa ke ulih diri. Dia iya lalu madah ke pengawa bepilih ngambi rekrut baru nyadi Sarawak Rengers tumu pagila. Iya pan ngasuh aku minta nyadi driver laban pengawa bukai baka nyadi officer enggau kerani udah diberi ngagai urang bukai. Taja pan tubuh mit tang pengawa driver tu endang enda beguna ke tubuh besai laban ukai kitai ke mai motor tang motor ke mai kitai. Dia iya pan lalu ngaga siti surat rekemen deka di bai maya bepilih pagila.

Tumu pagi, aku pan mai surat tu ngagai State Secretary Building ti bepalan ba antara Balai Polis Central enggau Indian Street enda jauh ari Court House. (Diatu building nya udah dirumpang perintah laban deka meri awak ngagai projek bukai). Surat nya tadi pan disurung ngagai Joseph Gawing, iya nya urang tengah ti begiga ke kitai iban ti deka gawa ba Malaya. Ari nya aku dibai betemu enggau pemesai pulis iya nya Johnical Kasim ti mai aku ngagai serdadu ribai. Pengawa bepilih pan diadu maya nya. Dia serdadu ribai ngasuh aku datai baru pegila lalu mai sekali surat periksa lutor serta gambar x-ray tubuh.

Ari siti iyanya ari kedua, pengudah pengawa beperiksa tubuh ba klinik perintah tembu, aku pan mai surat nya tadi lalu nyua ngagai serdadu ribai. (Tan Sri) Gerunsin bisi pengirau ba utai ke di temu lutor maya periksa tubuh tu tadi laban gamal tubuh aku ti mit sereta kurus. Tang serdadu ribai ke meda surat lutor tu tadi lalu ngasuh aku bekemas laban deka mupok pagila.

Hari ke tiga, kami ke udah dipilih nyadi rekrut baru deka bekejang lemai lagi. (Tan Sri) Gerunsing Lembart enggau Fedrick Augus ak Encana bisi ngulu beranjung ke aku ngagai Pengkalan Ban Hock endur alai Kapal MV Rajah Brooke sangkai. Kapal tu meh dikena bala kami belayar nuju ke Singapore.

Gambar ke diayan dibaruh tu iya nya gambar ba Pengakalan Ban Hock endur alai Kapal MV Rajah Brooke sangkai.

Lelaki tengah ke bediri sepiak kiba indu nya iyanya Fedrick Augus ak Encana (bala ari rumah panjai di Melupa gawa di Opis Pemadah Sarawak). Sepiak iya iyanya (Tan Sri) Gerunsing Lembart ke benung nginsap cigarrete.

Tu meh gaya pendiau urang mayuh ba Pengkalan Ban Hock maya beranjung ke pangan tau ke kaban ti deka bejalai ngagai menua bukai ngena kapal ti nyadi perengka pengangkut popular sereta amat beguna kena berangkut ke mensia mayuh maya jeman nya.

Rumah bechura burak ba belakang gambar tu iya nya Opis Pemadah Sarawak (Information Office Sarawak) tang diatu udah nadai agi. Rumah nya udah dirumpang perintah laban deka ngemanjaike Kuching Waterfront.