Pengingat Lama ari Warrant Officer (WO II) Tom anak Dap - Cherita 21

Sedili Besar bepalan ba nanga Sungai Sedili nebing Tasik China Selatan adap ke timur laut menua Johore. Urung tahun 1962, bala raban serdadu Sarawak Rangers enggau bini anak bisi kitu bejalai meda pemanah tasik enggau tebing sereta bemain rindu ati enggau bala pangan lalu bemalam ba endur nya bisi datai ngagai tiga hari. Pengawa ke dikumbai rest & recreational ba serdadu tu endang sigi bisi diatur ke ungkup raban serdadu maya nya kelebih agi sida ke bisi bini anak.

Ari Ulu Tiram raban serdadu Sarawak Rangers sereta bini enggau anak dibai ngena trak serdadu nempuh menua Mawai ke bisi ngembuan kampung ti agi jerung nengah jalai tanah mirah sebedau datai ba menua Sedili. Lebuh mansa menua Mawai tu, bisi ga aku mansut ke penemu ngagai bala bukai, nguji minta tanah ba kampung jerung tu ari Sultan Johore kena niri ke rumah panjai ngambika bisi temuda kitai Iban Sarawak Rangers ba menua Johore. Tang penemu tu enda diterima laban kampung jerung ba menua Sarawak agi mayuh, pia mega babas agi bedandang besai bedau diperimba.

Ba menua Sedili tu, kelimpah ari tebing tasik ke bepasir, mayuh bengkah pemesai batu  mega bisi ba tebing tasik Sedili Besar. Sekeda batu tu tenggelam maya ai tasik pasang, lalu bisi dipeda maya ai tasik surut. Pendiau sekeda ari batu nya baka ke dipandang ba gambar baruh tu.

Begambar ba tebing di menua Sedili Besar begulai enggau Wilfred Busu anak Minggat, sepiak kiba gambar.

Aku ari kiba gambar begulai enggau Minggang anak Ingkas ba tengah lalu ditangkanka Wilfred Busu anak Minggat ba sepiak kanan gambar. Gambar diambi ba tebing tasik Sedili Besar Johore

Minggang, bediri ba tengah ba gambar di atas ke mayuh ukir ba tubuh  masuk nyadi serdadu dulu ari aku maya Sarawak Rangers agi dalam Federation Unit. Iya tu menyadi Indang anak Ingkas. Pengawa beukir tubuh tu endang bisi dikereja bala Iban maya nyadi serdadu Sarawak Rangers. Bisi sekeda sida nambah iya ke udah dibai sida ari rumah panjai. Lalu bisi sekeda belabuh ngaga lalu di tulis sida iya Johore Malaya sereta enggau tahun lebuh maya sida iya bepantang ukir. Bakanya mega bala bukai ke pulai ari Brunei ti enggau berambun ke nyawa ngenanka Brunei ari raban pengacau hujung tahun 1962 ngagai pun tahun 1963. Kena ingatka diri ti udah gawa di Brunei, lalu ukir sida iya betuliska Brunei sereta tahun.

Lebuh begaga ke pengawa bepantang ukir tu, suah endar panggal ke disediaka serdadu kamah gasak ke alung ti dikena beukirka tubuh. Panggal tu nyadika sambal tubuh sida iya ngambika nyamai agi begagaka ukir. Aku ke gawa ba Quarters Master Department, iyanya opis endur nyediaka pakaian, pemakai, perengka peninduk enggau utai bukai, bisi kala bepadah meri jaku tangkan ngambika nyaga pemersi perengka serdadu ke disedia ngagai sida iya. Lebuh ke ingat, bekena ke poncho meh sida tu dijadika selap ngambika enda ngamahka perengka bukai.