Pengingat Lama ari Warrant Officer (WO II) Tom anak Dap - Cherita 5

Nyadi Pengajar

Laban  alai nyambung belajar ngagai endur ke tinggi agi enda entu chukup penuduk taja pan result sekula form tiga manah, nya kebuah mai ati ti berat pulai ke menua ngiga pengawa ke ulih nerima pemandai certificate form tiga.

Ba menua, aku diterima nyadi pengajar ba Budu Development Scheme (BDS), Krian, Saratok, Kelaka berengkah ari tahun 1957 ngagai ujung tahun 1958. Taja pan nadai ngebuan certificate ngajar, sekula ba skimnya beguna endar ke pengajar labanke enda chukup urang ke bisi penemu nulis enggau macha. Gaji diberi BDS bisi manggai ngagai $90.00 sebulan. Ba skim tu, aku bisi ngajar ba dua bengkah sekula iya nya Ulu Budu School, Krian, Saratok sereta Sungai Engkilili Shcool, Krian, Saratok.

Bala pembesai skim tu, naka ulih minta ari Opis Pelajar Sarawak nerima sekula ke bisi di skim tu nyadi sekula ke diterima perintah. Nyau kelama udah nya, Opis Pelajar Sarawak lalu ngemendar sereta nerima sekula tu nyadi sekula ke dirigister di menua Sarawak.

Pengawa ngajar tu mega buleh pemendar ari Opis Pelajar Sarawak ti ngerigister serta ngeluarke certificate ke ngesah pengawa ngajar tu tadi. Berengkah sahari nya mega gaji ke diterima dibayar ari Opis Pelajar tu.

Di baruh tu mandangke certificate ti dikeluarke Opis Pelajar Sarawak:

Ba certificate ke dipandang ba atas, bisi ngayanke alai skula endur aku ngajar iya nya Ulu Budu School, Krian, Saratok berengkah 1 Januari 1958 ngagai 31 Mac 1958. Udahnya ditukar ngajar ke Sungai Engkilili Shcool, Krian, Saratok, ngagai 1 Oktober 1958.

Di baruh tu dirintai gambar ke diambi maya ke nyadi pengajar kelia.

Gambar ngemelakangke Kuarters Staff ba Budu Development Scheme, Krian,  Saratok, Kelaka iya nya alai bala diau bemalam ke gawa Betanam, Pengentu Pengerai tauke Perubat sereta Pengajar .

 

Gambar Budu Development Scheme bepalan ba Krian,  Saratok, Kelaka di ambi urung tahun 1957. 



Welcome to all strangers Sg. Engkilili School





Gambar atas diambi ba Sungai Engkilili School, Krian, Saratok. Papan kelai ke digantung ba atas pintu ngelalu bala temuai ke sekula nya digaga aku maya ke nyadi pengajar ba sekula nya.



Gambar atas ngayan ke pengawa maya lepa diambi ba Sungai Engkilili School, Krian, Saratok.