Pengingat Lama ari Warrant Officer (WO II) Tom anak Dap - Cherita 12

Pindah ka Baird Camp Ulu Tiram

Kena bulan 3 1960 kami duai Pte. Manja dipindah ngagai Kem Ulu Tiram Johore Bahru begulai enggau Sarawak Rangers ti benung sama pindah ari Kem Port Dickson ngagai kem nya. Kem ke alai bala Sarawak Rangers bepalan ba Ulu Tiram nya diberi nama Baird Camp ngangkatka nama Lt. Col. Baird ti terubah iya nyadi Ketuai Kepala (CO) Sarawak Rangers. Ba alai endur ke baru tu, Sarawak Rangers dijadika siti unit ti di kumbai Special Tracking Unit dipegai sereta diperintah ulih Serdadu British. Sida tu tadi di atur ngagai tiga iti platun ti mai ukoi penyidi enggau perengka wireless kena bejaku kin kia enggau pangan diri.

Gambar ke dirintai ba baruh tu mandang ke gaya pendiau Baird Camp di ambi urung tahun 1960 an.

Gambar Kuarters Kelamin

Captain Peter Marr meresa pemersi kuarters kelamin



Captain Peter Marr tu pegawai bansa ribai ari England ti nemu jaku Iban enggau jaku Laut. Iya nyadi serdadu ti bepalan ba Hong Kong. Iya lalu ditukar ke Sarawak Rangers urung tahun 1963. Beserimbai enggau penumboh 1 Renjer kena 16 semptember 1963, iya lalu megai pengawa Adjutant Batalion. Maya nya iya baru manggai umur 25 tahun.  Kala enggau Batalion 1 Renjer pindah ari Baird Camp ngagai Kandy Line Training Depoh Brigade of Gurkhas ba Sungai Petani, Kedah, palan alai ngelatih serdadu Gurkha maya nya.
 

Gambar Bilik Kelas 

Bilik kelas dalam Baird Camp



Gambar diatas ngayanka bilik kelas ke endur alai anak Iban serdadu Sarawak Rangers belajar berengkah ari tahun 1960 ngagai tahun 1963. Sekula ngagai bala serdadu pan bisi mega diatur tang ukai ba kelas baka ke dipandang ba gambar atas. Serdadu Iban tu diatur belajar ba dewan ke besai agi.

Bala kitai Iban ke nyadi serdadu ketebal iya nadai nemu macha sereta nulis laban maya nya suba sekula nadai tentu bisi. Nya kebuah sida tu tadi dipasukka dalam kelas macha enggau nulis. Aku maya nya bisi kala diasuh nyadi pengajar  labanka bisi peneleba ba pengawa ngajar sebedau nyadi serdadu (peda Cherita 5). Bisi siku kitai Iban iyanya Pte. Galang kala nyadi pelajar aku. Bisi sekali maya belajarka huruf A B C, huruf tu endang dikeingatka iya baka ni deka nyebut enggau baka ni deka nulis. Hari siti aku ngajar serta nerang ngagai sida iya baka ni nulis huruf tu. Laban iya tu tadi endang deka amat belajar nya kebuah iya ingatka huruf ka diajar. Tang saharinya, iya meda huruf tu ditulis lain tang sama bunyi. Iya pan lalu betanya nama kebuah kemari lain huruf A sari tu lain huruf a. 

Bala pemacha, kitai diatu sama nemu baka ni chara nguna huruf A sereta huruf a. Huruf besai selalu diguna kitai maya deka nulis pun nama kitai tauka maya deka berengkah ngaga jaku. Pengudahnya ditangkan ke huruf mit.

Setahun nampun dilangit, sebulan nanjan di bukit. Udah pengalama belajar, hari beganti hari, minggu beganti minggu, bulan beganti bulan, bala kitai Iban udah nya lalu nemu nulis sereta macha. Pte. Galang sereta sekeda sida tu tadi ulih nulis surat ngagai rumah panjai madahka pendiau diri maya gawa nyadi serdadu di Malaya.

Gambar Kandang Kuda

 

 

Gambar di atas ngayanka kandang ti diperambu deka dijadika kandang kuda. Kuda tu tadi diperambu deka dikena serdadu beanjungka perengka sereta pemakai (ration) ngagai palan ke jauh ti enda datai kereta darat kelebih agi ba kem ti bepalan ba menua bebukit.

Nyadi kuda tu endar mayuh dikena serdadu ti bepalan di menua Hong Kong. Kebuah nya pia, laban gaya menua Hong Kong tu bebukit sereta nadai jalai alun nuju ngagai kem serdadu. Kuda tu amat beguna endar kena beanjungka perengka sereta pemakai serdadu ti enda ulih dianjung ngena kereta serdadu.

Urung tahun 1961, penyampau 15 iku serdadu Sarawak Rangers dianjung ka Hong Kong belajar cara nepan serta ngemai kuda tu laban deka numbuh ke Platun Berangkut Ngena Kuda (Mule Tranport Platoon). Antara bagi sida iya tu, iya nya Colour Sargent Jimba anak Layang, BEM enggau Pte. Arah anak Chaong. Bala ke bukai enda ulih dikeingatka agi. Sida tu bisi datai ngagai 3 bulan belajar sereta bekursus din.

Tang pengawa serta perambu deka numboh platun tu enda mujur laban kuda nadai datai ari Hong Kong ditambah mega Sarawak Rangers deka dibubar laban deka meri awak ngagai Batalion Ka Satu Regiment Rangers. Rumah nya pan lalu ditukar nyadi rumah opis kuaters master.