Pengingat Lama ari Warrant Officer (WO II) Tom anak Dap - Cherita 25

Tampung ari Cherita 24

Datai ba Pasar Sibu, aku enggau dua iku pegawai ari raban bansa Ribai iyanya Tuan OC Major D.L. Bruce Merrie, MC (Officer Comanding Sarawak Rangers) enggau Capt. Mike Bolton diau bemalam ba goverment rest house beantika kapal ke bisi bekejang ke Singapore.

Sekumbang diau ba Pasar Sibu, aku nadai kala berasai sunyi laban bisi kaban ari Rumah Panjai Samu Paku Saribas iyanya Matthew Sumbang ti gawa ba Pos & Telegraph (P&T)Sibu ti selalu begulai enggau aku nyiting malam berandau ngelantangka ati. Lebuh maya nya, palan ke bisi merindag ati ti dikerinduka urang bujang mina night club aja. Dia meh bala berandau enggau pangan diri ngirup ai bir sambil ninga lagu ari penanyi ke bisi merindang bala temuai ke datai. Mayuh macham lagu bisi disada bala penanyi lebuh maya nya. Tang ketebal agi mayuh lagu ari raban bansa China tauka Mendarin. Kelimpah ari ninga sada lagu ari penanyi, mayuh macham lagu mega ulih didinga ari jukebox. Jukebox tu iyanya sebengkah perengka bebayar ke ulih mainka lagu ke udah dipilih pengudah duit sen ditepuk ngagai mesin nya. Tebilang ba tahun 60an.

Lebuh di Pasar Sibu, bisi siku bansa Ribai iyanya Lord Midway ti nyadi pengajar ba menua Bario, bisi bepinta ngagai Tuan OC Major D.L. Bruce Merrie, MC  ngasuh David Labang dipadu nyadi raban soldadu Sarawak Rangers. David Labang tu datai ari menua Bario ari raban bansa Kelabit bisi kala besekula ba Tanjung Lobang Miri. Maya kami mupuk bekejang ke Singapore bekena ke kapal dagang MV Kimanis, David Labang pan sama bereta enggau kami.

David Labang tu siku-iku ari raban bansa Kelabit ke nyadi soldadu ba Sarawak Rangers maya nya suba. Bisi setahun David Labang tu ba Sarawak Rangers, iya pan lalu bakal patung dibai iya main rugby. Laban ke bisi pemedis ba pala patung, iya lalu minta diketuka servis soldadu taja pan bedau abis kontrak 3 tahun. Maya nya Lord Midway ke nulong iya bepinta nyadi soldadu Sarawak Rangers benung nyadi pengajar tauka pensyarah ba Universiti Malaya di Singapore. Iya pan lalu ngambi David Labang gawa ba library di Universiti Malaya. Maya Lord Midway tu badu nyadi pensyarah ba Universiti Malaya lalu deka mulai kediri, iya lalu mai David Labang sama bereta iya ke England. Di England, David Labang bisi nyambung belajar. Tembu belajar, David Labang lalu pulai ke Sarawak lalu gawa ba Sarawak Forestry Department ba bagian nyaga jelu siga.

Gambar di atas di ambi tahun 1962 ba Baird Camp, Ulu Tiram, Johore  ngayan ke aku ari sepiak kiba gambar begulai enggau David Labang ba tengah enggau Bandi besandika radio. Bandi tu kitai Iban ari Selepong direkrut nyadi soldadu Sarawak Rangers tahun 1961 sama intake enggau David Labang.