Admin berasai gaga laban dipilih nyadi sekeda ari raban tim ukur ke nyukat antara menua kitai enggau menua ti dipegai perintah Indonesia. Terubah enggau opearasi ukur tu iya nya urung tahun 1993. Maya nya tim kami dipinta nyukat antara menua ba Raan Makang. Menua tu enda jauh ari Bareo iya nya empat jam bejalai kaki. Raan tu iya nya jaku Murut ti enda salah aku meri reti sebengkah ari gaya tinteng bukit ke bisi alur ke melah tinteng nya lalu nyadi jalai ti ulih ditengah mensia. Raan Makang tu sekeda ari jalai ke ulih ditengah ba kampung jerung ti meraka tinteng bukit ke nyadi antara menua kitai enggau menua ke dipegai perintah Indonesia.
Maya ngerja pengawa nyukat tu, palan ti nyadi markas tau ka base camp ti nyadi pusat operasi dipejadika enda jauh ari antara menua tau ka endur gawa ngambika awak ti diambi nurun gawa enda tebasau. Ba palan tu ngebuan opis, khemah pegawai, khemah pekerja, setor, dapur, pendai, agu, court takraw sereta mayuh macham utai agi.
Gambar di atas ngayanka base camp ba Raan Makang diambi urung tahun 1993. Ba gambar nya mega bisi ngayanka dapur ba sepiak kiba, opis ba baruh, khemah bala pegawai ba sepiak kanan, udahnya khemah pekereja ba atas. Tengah-tengah gambar nya rumah setor tau ka rumah injin api (rumah ke enda bedinding). Gambar tu di ambi ari tinteng bukit. Siti agi gambar ti diambi ari endur ke sama iya nya baka ke dipandang ba baruh tu.
Gambar atas ngayanka admin ti benung niki tangga deka nurun (niki?) gawa. Tu meh gaya pendiau base camp kami. Pengalama kami ba siti-siti endur bisi manggai ngagai meniga bulan. Cura chelum ti dikena admin ba kaki nya iya nya stokin anti leech tau ka stokin ti enda ngemendarka lemetak tama. Lemetak mina ulih niki tang enda ulih tama laban stokin tu digaga ari kain belachuk. Menua tu endang sigi mayuh lemetak laban ke agi kampung jerung mayuh jelu.
No comments:
Post a Comment