Pengingat Lama ari Warrant Officer (WO II) Tom anak Dap - Cherita 26

RASC WING F.E.T.C.

Royal Army Supply Corp Wing, Far East Training Centre tauka RASC Wing F.E.T.C. bepalan ba Nee Soon Barrack, Mandai Road, Singapore. Palan tu suba suah ngatur pengawa ngelatih bala soldadu kelebih agi soldadu ti dipegai sereta dikuasa ulih perintah British baka raban soldadu Sarawak Rangers. Mayuh macham kursus bisi di atur ba palan tu maya nya baka kursus Motor Transport, Clerk, Fire Duties, First Aid Instructor, CQMS Duties, Wireless Operator (Signaler), Cook sereta mayuh macham agi.

Reporting Centre tau ka palan alai pelatih ngelapor sereta nyerah dokumen.

Terubah aku datai ba barrack tu iya nya bulan lapan tahun 1959 maya baru nyadi soldadu (peda Cherita 9). Barracks tu suah endur alai soldadu transit tau ka bemalam enda lama lebuh deka mindah ke bukai.

Kelimpah ari palan endur ngelatih bala raban soldadu, Nee Soon Barrack mega bisi nyediaka palan endur diau baka kuarters bujang sereta kuarters bagi soldadu ti bisi ruang bilik. Perengka guna bukai baka padang endur bemain bisi mega disediaka ba barrack tu.

Gambar di atas ngayanka rumah betingkat ti dijadika palan endur diau bagi raban soldadu ukai pegawai ari Malaya (Malayan Other Ranks) ti bisi ruang bilik ti gawa tetap ba Nee Soon Barrack. Palan endur raban soldadu ti ngambi kursus Motor Transport diatur ba rumah ke enda jauh ari kuarters tu iya nya sebedau rumah betingkat ba sepiak kiba gambar.

Nee Soon Barrack Singapore 21 Oktober 1961.

Dua iti rumah betingkat berimbai sepiak kanan gambar atas dijadika palan endur ngelatih raban soldadu ti di atur ba tingkat baruh. Ba tingkat atas dijadika bilik endur diau. Rumah betingkat sepiak kiba gambar mega dijadika palan endur diau.

Gambar atas ngayanka palan ke sama ari sukut bukai. Ba gambar tu aku bekenaka gari uniform soldadu betancut panjai bepangkat L/Cpl maya ngambi Unit Officers and NCOS Fire Duties Course urung tahun 1961.

  

Ai coke cola ke dipegai aku ba gambar atas dibeli ari sloting machine tau ka mesin bebayar ti nyual ai ti dipilih pengudah duit siling ditepu ngagai mesin nya. Perengka tu endang sigi bisi disediaka ba barrack tu. Maya nya rega sebotol ai coke cola mina 20 sen dijual ba kedai NAAFI.

Aku mega kala enggau bekursus ba palan tu suba. Sekeda ari kursus ke diatur maya nya iya nya baka kursus First Aid Instructor ti diatur kena bulan November 1962. Dibaruh tu mandangka certificate ke diterima ngesahka udah mujur nembuka kursus tu.

Kelimpah ari ngenataika diri begulai enggau raban soldadu bukai ke dipegai perintah British ngagai kursus ke bisi diatur, bala raban soldadu mega bisi ngambi peluang raun bejalai ngelantangka diri lebuh maya lepa. Maya ngambi Basic Clerk Course urung tahun 1962, bisi sekali kami deka bejalai raun ke Kota Tinggi bekena ke kereta ti disiwa begulai enggau soldadu ari menua bukai. Siku ari sida tu iya nya soldadu raban bansa Cina ari menua Hong Kong (enda ingatka nama) sama enggau kami bejalai raun meda menua Johore. Iya tu bisi penemu bebai ke kereta lalu deka nguji bebai ke kereta ba menua Johore. Lebuh deka ngetu ngisi minyak, enda mukai-mukai kereta ke dibai iya tu tadi lalu ngelantak pam stesen minyak. Nadai ku enggau iya meh, utai udah nyadi, taukey ke empu stesen minyak minta ganti rugi. Iya ti mai kereta tu tadi nadai cukup duit. Nasib aku bisi duit. Lalu bepinjau meh iya ari aku kena mayar taukey tu tadi. Iya lalu besemaya deka mulaika duit tu ngagai aku maya bisi duit ila.

Apin lama udah nya, nyau enda beresai udah deka tembu kursus. Soldadu ari Hong Kong tu tadi lalu deka mulaika duit ke udah dikena iya. Tang nama meh daya duit iya enda ga cukup. Lalu berunding meh iya deka mayar ngena seset gari kot bansa Ivy Style. Aku lalu setuju nerima seset kot tu tadi laban kot tu ari bansa ke manah ti setepak enggu duit ke dijali aku.

Tu meh gaya kot ke diberi soldadu ari Hong Kong ti dikena iya mulai ke duit ti diinjau kena mayar ganti rugi pam minyak ke dilantak iya maya nurun bejalai ke Kota Tinggi. Gambar tu diambi ba barracks endur diau mayaka ngambi Basic Clerk Course begulai enggau raban soldadu bukai ke dipegai perintah British ke bisi diatur urung tahun 1962.

Gambar dibaruh tu ngayan ka bala soldadu ke bisi datai ngambi Basic Clerk Course ba Nee Soon Barrack.

Lumor dua ari kiba bediri di belakang iya nya soldadu ari Hong Kong ke nganti duit ke diinjau iya ari aku enggau baju kot. Sepiak kanan iya tau ka lumor satu ari kiba gambar tu iya nya soldadu ari Singapore ari raban bansa Cina mega. Seduai iya tu enda tau begulai, enggai bepedaka pangan laban enda sebaka penemu. Ba gambar nya mega bisi ngayan ke tuai pengajar tau ka cheif instructor ti duduk ba tengah. Sepiak kanan iya nya pengajar kami. Aku duduk ba lumor satu ari kiba gambar.

Apin lama aku bekena ke kot tu, bisi ga bala rindu amai ke kot tu. Chambai anak Bangga, kitai Iban ari rumah panjai Kawit, Saratok rindu amai ke kot tu laban gaya kot tu ti dipeda iya nitihka fesyen ti baru lebuh maya nya. Iya lalu bepinta betawar deka meli kot tu ari aku. Meda iya ti amat rinduka kot tu, aku pan lalu ngau tanda setuju deka nyual ngagai iya. Enda ingat berapa rega iya meli kot tu, tang asai sepi aku lebih ari duit ke dijali aku ngagai soldadu ari menua Hong Kong.