Kelimpah ari kar ke dibai kena nentu ke penunga jalai, kitai mega uli nitih ke tapak kaki bechura mirah ba simen baka ke dipandang ba gambar baruh.
Pia mega, plat dicat kuning bisi dipasang ba dinding simen baka ba gambar tu.
Semua endur ke dipansa bisi datai ngagai 15 lokasi tang laban ke suntuk awak, mina ngenatai ke diri ba sekeda endur alai aja. Antara endur ke dilawa iya nya Tugu Pryer, tugu kena ngenang William B Pryer urang ke numbuh Pasar Sandakan Modern.
William Burgess Pryer tau ke William B. Pryer iya nya urang ke ngepun ngaga pemansang ba Pasar Sandakan. Iya tu meh urang ke terubah nyedia atur adat sereta polisi ngatur pendiau lalu ditangkan ke tuai pemesai bukai pengudah iya. Iya ngemadu ke diri ari megai pengawa pemesai Sandakan sereta chairman British North Borneo Development Corporation urung tahun 1890.
Berimbai enggau Tugu William B Pryer, Tugu Pengingat Perang Dunia ke-Dua bisi mega digaga serta didiri ke. Tugu tu digaga kena ngenang pengawa mensia ke pemadu jai ti kelalu udu merinsa mensia bukai maya Perang Dunia ke-Dua nyadi.
Betunga enggau endur tu iya nya Muzium Warisan Sandakan bepalan ba Bangunan Wisma Warisan.
Maya tu, muzium bisi ngayan ke gambar ke bisi besangkut enggau sejarah asal menua Sandakan baka gambar bangunan lama, gambar bansa ke bisi di Sandakan baka bansa Tenggara engga bansa Remanau, gambar rampa menua sereta mayuh macham gambar sereta raplika rumah.
Kena nerus ke pejalai, kitai mega deka niki tangga ke bisi 100 iti tingkah nuju ngagai tuchung bukit. Ba tuchung bukit tu endur alai English Tea House & Restaurant sereta Rumah Agnes Keith.
Ngetu enda lama ba English Tea House lalu mesan ai kena masah ke rekong. Ditu mega kitai ulih meda gaya menua Sandakan ari tuchung bukit.
Enda jauh ari English Tea House tu, kitai ulih nemuai ke Rumah Agnes Keith. Tiket rega RM 2.00 deka dibayar maya masuk ke Rumah Agnes tu.
Rumah Agnes Keith tu dijadike kuarters ulih perintah British endur alai pemesai konservator kampung (conservator of forest) diau. Pemesai konservator kampung ke terubah iya diau ditu iya nya Harry Keith sereta bini iya, Agnes Newton Keith, urang putih bansa Amerika. Seduai tu diau ditu urung tahun 1930an ngagai jeman Jipun datai urung tahun 1942. Rumah banglo papan dua tingkat tu digaga ba atas bukit ngadap ngagai tasik serta Pasar Sandakan. Rumah tu runtuh maya perang dunia kedua tang digaga baru maya Keith pulai kia urung tahun 1946. Agnes Newton Keith tu tebilang ari bup ke dikarang iya empu urung tahun 1939 iya nya Land Below The Wind tau ke Nengri Dipuput Angin maya iya diau di rumah nya.
Bejalai nurun ari Rumah Agnes Keith nengah Jalai Istana lalu mansa Menara Jam nuju ngagai endur bukai.
Gereja St. Michael & All Angels di Bukit Elton digaga uleh arkitek B. W. Mountfort ari menua New Zealand. Gereja Anglika ya ke terubah iya berengkah digaga ngena kayu belian lalu ditangkan ngena batu granit ti dibai ari menua Buli Sim Sim. Gereja tu tembu ngambi awak 20 tahun ari berengkah ngaga urung tahun 1888. Utai ke ulih ari awak ke diambi tu iya nya siti bangunan gereja ke pemadu manah, tegap sereta unik di Sandakan. Tu meh pesaka lama ti patut dijaga ngambi ke rebak baru ulih meda sereta merati ke gaya arkitek maya nya suba.
Tiket enggau rega RM 10.00 deka dibayar temuai sebedau ulih ngenama ke diri ke dalam gereja tu.
Enggau endur ke dudi sekali tu, nya meh ngujung ke pejalai kami ti nitih bekau pesaka kenang lama di menua Sandakan. Jalai tu enda tembu ditu aja tang agi mayuh nuju ngagai endur bukai. Mina sekeda aja dilawa laban ke suntuk awak maya nya. Awak ke diambi kami maya bejalai nitih ke tapak kaki bachura mirah tu bisi manggai ngagai 3 jam berengkah ari hotel endur kami diau iya nya Swiss-Inn Waterfront Sandakan enggau mulai ke diri ke hotel nya baru.
Nota:
Gambar ke dipandang ba atas diambi kena 3 Mac 2011, lebuh bejalai ke menua Sandakan maya pengawa baum ke garis antara menua Malaysia - Indonesia.
No comments:
Post a Comment