The State War Memorial Cenotaph

Tugu Pengingat Perang ba menua Perth Australia bepalan ba tuchung bukit Kings Park nunga ngagai pasar besai Perth ti berimbai enggau Sungai Swan sereta Sungai Canning ti amat manah dipeda mata.

Tugu tu digaga ari batu sereta konkrit lalu gaya tugu tu nitih gaya obelisk ti datai ngagai 18 meter peninggi. Tugu tu mega nunda tugu ke udah di gaga ba menua Prancis sereta Belgium ti kena ngenang serdadu Australia ke udah lesi bebadi ba menua Europe maya perang dunya ke-satu kelia.

Ba baruh tugu tu mega bisi disedia ke ruai bedindingke batu marmar  ti di urik nama lebih 7 000 iku serdadu ti lesi bebadi maya perang dunya ke-satu kelia.

Bakanya mega plak engkaraju bisi mega dilekat ba penama ruai tu ti bisi ngebuan nama 4 000 serdadu tasik, serdadu langit sereta serdadu darat, indu enggau lelaki ti mega lesi bebadi maya perang dunya ke-dua kelia.

Dia mega bisi diurik nama serdadu ba dinding batu marmar ti udah bebadi maya perang Korea (1950-1953), darurat ba Malaya (1950-1960), konfrontasi ba Borneo (1962-1966) sereta perang ba menua Vietnam (1962-1973).

 

Tugu tu berengkah digaga urung tahun 1928 lalu tembu kena 29 November 1929.  Setiap Anzac Day iyanya hari kena ngingat ke serdadu ti udah lesi maya perang tu dipejadike kena 25 April nyinting tahun. Pengawa tu bisi narit mayuh temuai datai ari serata menua.

Admin sebilik udah nemuai kitu kena 27 Ogos 2009 maya raun ke menua Perth, Western Australia.