Bala raban serdadu Iban Sarawak Rangers ti bepalan ba Baird Camp Ulu Tiram suba bisi disediaka perengka pengangkut minibus ti diberi tulung ari Lord Nuffel Trust ti dikena bejalai raun rindu ati ngelantangka diri begulai enggau pangan tauka bini enggau anak ngagai endur bukai ti tau naritka ati ba menua Johore tauka Singapore.
Perengka pengangkut minibus tu dikeluarka Motor Morris Company ti bepalan ba Orchid Road Singapore. Aku sekeda ari bala serdadu Iban Sarawak Rangers ke bisi lesen bebaika perengka pengangkut dipinta nurun ke Orchid Road Singapore ngambi minibus tu lalu dibai ke Baird Camp Ulu Tiram, Johore.
Dibaruh tu mandangka gambar luan minibus ba sepiak kiba gambar. Gambar tu diambi urung tahun 1962 lebuh raun ngelantangka diri ngagai Botanical Garden Singapore. Enselit ba pemuka pintu minibus nya sarung tripod kamera ke dikena ngambi gambar tu. Bala serdadu Iban Sarawak Rangers, enti pansut ari kem lebuh hari ke nadai kereja mesti bekenaka gari bepanjai lengan, beseluar panjai sereta bekasut kulit baka ke dikena kami ba gambar tu. Bekena ke gari gap tu endang sigi atur perintah serdadu.
Gambar tu mega ngayanka David anak Jaun ba sepiak kiba nyandih ba pintu minibus, lalu ditangkanka Buda, udahnya David Labang siku-iku ari raban Kelabit ke bisi ba Sarawak Rangers. Aku ba sepiak kanan gambar.
Kelimpah ari meri tulungka perengka pengangkut minibus ngagai raban serdadu Sarawak Rangers, Lord Nuffel Trust mega bisi meri 5 laras shortgun (12 bore SBBL Shortgun Webley & Scottland) ke dikena bala serdadu Iban Sarawak Rangers ngasu. Nyadi senapang tu disimpan ba armcote tauka gudang senyata ba dalam kem. Sapa deka begunaka senyata tu sereta udah bulih pemendar ari pegawai serdadu ke bekuasa, ulih ngambi senyata tu ari gudang senyata kem. Senyata tu baka dipandangka ba gambar dibaruh tu.
12 bore SBBL Shortgun Webley & Scottland
Ngayanka ukir ti ditulis Made In England tauka Digaga Ba England
Taja pan Sarawak Rangers udah nadai agi lalu diganti enggau Batalion Ka-Satu Rejimen Renjer, shortgun tu agi mengkang disimpan nyentuk ngagai tahun 1977. Dalam tahun 1977, perintah besai ba serdadu Rejimen Renjer, maya nya Rejimen Renjer bepalan ba Kem Pakit Seri Aman, deka meri shortgun tu ngagai urang ke nadai udah bisi ngembuan senapang diri empu sereta udah lama nyadi serdadu ba Sarawak Rangers. Nyadi shortgun tu diagih ngagai bala kami iyanya aku empu, David anak Jaun, Biily anak Panyau, Bandi anak Apat enggau siku agi (enda ingat sapa nama iya), ti agi bedau nyadi serdadu Rangers sereta nadai ngembuan senapang diri empu.
No comments:
Post a Comment