Pengingat Lama ari Warrant Officer (WO II) Tom anak Dap - Cherita 10

Tampung ari Cherita 9

Nyadi Driber Serdadu

Kami training nyadi serdadu ba Kem Port Dickson bisi manggai ngagai 2 bulan berengkah ari bulan Lapan ngagai bulan Sembilan 1959. Maya trainingnya, kami diajar bebaris, nembak sereta mayuh macham agi pengawa ke dikerja ke bala serdadu. Tembu training aku enggau siku agi kitai Iban iyanya Pte. Manja anak Kendawang ari menua Kanowit dianjung ke 69 Coy Royal Army Supply Corp. (69 Coy R.A.S.C.) bepalan ba Kem Paroi, Seremban, Nengeri Sembilan. Ba kem nya kami duai tu tadi diberi kursus mai kereta serdadu. Kursus tu berengkah ari bulan Sepuluh 1959 ngagai bulan Satu 1960. Semua jalai ke bisi ba Nengeri Sembilan maya nya udah ditengah magang. Kami mega bisi diajar subjek mekanik iya subjek ngerepair kereta ngambi ke kami nemu kati deka ngadu ke kereta enti sema jai ba rantau jalai.

Gambar ba baruh tu iyanya gambar aku begulai enggau Pte. Manja anak Kendawang sepiak kanan aku ba kereta Land Rover serdadu. Duduk dalam motorkar Austin dibelakang kami nya iyanya Cpl. Aziz bin Uda ari Kuala Pilah. 

Maya belajar bebai ke kereta serdadu nengah jalai ke bisi di Nengeri Sembilan, bala kami mega bisi ngambi peluang begambar ba endur ke narit ati. Ba baruh tu begambar ba Jambatan Merdeka dalam siti taman ke bisi di Kuala Pilah, Nengeri Sembilan bulan Oktober 1959.

Dalam gambar nya, bediri ari kiba iyanya Sjn. Khairudin (driver instructer), udahnya serdadu bansa tambi enda ingat ke nama sama enggau kami ngambi kursus driver, lumor tiga nya aku, udahnya Pte. Manja anak Kendawang.

Dua iti gambar ke dirintai ba baruh tu, iyanya gambar ke diambi aku maya bejalai ba Pasar Port Dickson, Nengeri Sembilan ujung tahun 1959.

 



Dua iti gambar di baruh tu iyanya gambar diambi ba dewan makai ba Kem Paroi. Gambar tu mega diambi ujung tahun 1959.

Kami duai Pte. Manja anak Kendawang ari Sarawak Rangers begulai diau enggau serdadu ke dikumbai Malayan Other Ranks ba berack ke di sedia serdadu British ba Kem Paroi. Malayan Other Ranks tu iyanya sida ke datai ari menua Malaya ti register nyadi serdadu British ke ukai megai pangkat pegawai (None Commission Officers, NCOs).

Dua iti gambar dibaruh tu ngayan ke kami duai begambar begulai enggau serdadu Malayan Other Ranks  diambi ujung tahun 1959. Berack di belakang kami nya iyanya berack endur alai kami diau.



Bediri di belakang ba tengah iyanya Pte. Manja anak Kendawang,
aku bediri ba kanan sekali.
Duduk ba sepiak kiba iyanya Cpl. Aziz bin Uda.

 


Gambar sama mega, mina endur alai begambar betukar.
Bediri di tengah di belakang iyanya Pte. Manja anak Kendawang.
Aku duduk sepiak kiba, duduk sepiak kanan iyanya Cpl. Aziz bin Uda.



Cpl Aziz bin Uda datai ari Kuala Pilah rindu endar begulai enggau kami duai Manja. Iya selalu mai kami duai bejalai raun ba menua Paroi, Seremban.

Gambar ba baruh tu diambi bulan Sepuluh 1959 ngemelakang ke bilun serdadu di kumbai Single Pioneer. Bilun tu dikumbai Single Pioneer laban iya bisi siti set propeler tau ke kipas ba mua bilun nya.