Pengingat Lama ari Warrant Officer (WO II) Tom anak Dap - Cherita 23

Urung tahun 1961, aku bisi dipinta begulai enggau raban soldadu Sarawak Rangers ti begigaka urang di menua Sarawak ke deka direkrut nyadi soldadu. Pengawa begigaka urang tu endang digaga nyiting tahun, suah agi ba ujung bulan April, laban pengawa kitai Iban ke betanam tupi kelebih agi  baka ngetau padi udah tembu. Nadai kala puntan lebuh begiga ngambi urang ti deka nyadi soldadu.

Bala raban berekrut soldadu Iban Sarawak Rangers maya nya nyengkaum dua iku pegawai soldadu Ribai iyanya Tuan OC Major D.L. Bruce Merrie, MC enggau Capt. Mike Bolton, siku lutor soldadu Ribai iyanya Major Doctor Crowdy, Warant Officer II RQMS Jims Emray, Sgt. Ningkan anak Kasau, enggau tiga iku lain-lain pangkat (NCO) nyengkaum aku empu. Menua ke endur alai berekrutka urang tu endang udah dipilih dulu agi iyanya Kuching, Simanggang enggau Lubok Antu. Nyadi perengka pengangkut maya nya bisi bekenaka long boat tauka perau panjai laban menua Sarawak apin bisi mayuh jalai alun. Datai ba siti-siti menua, dia bala kami betemu enggau Tuan DO sereta tuai-tuai Iban ti udah di tesau bebaika nembiak iya ke deka nyadi soldadu.

District Opis ke endur alai bepilih, capuh enggau pemayuh bala raban Iban. Bisi sekeda bekenaka sirat lalu bepayaka kain ti disungkit. Iku sirat dikelapung ngena gerunung. Pala ditangkupka ketapu rutan ti diujakka lelanjang bulu ruai, langgai tajai tauka bulu kenyalang. Bebaju kebat dikumbai Baju Burung ti beukir mayuh macham. Dada disengkabung ngena gagung kulit remaung raras tauka beruang rambai. Rekung dikungkung marik rantai. Berang dipasuk simpai pirak tauka simpai tapang. Ilang ti ditangkin bejejabungka buk munsuh ke begelung bauh ngelegetang. Terabai ti dipegai bekenarau penuh ukir. Betis dipasuk enggau engkerimuk ti digaga ari pirak sereta diselat ngena unus ti digaga ari rutan. Sida ke ngepan baka tu ke batang iya kena ngerami ke bala ti deka nyadi raban soldadu Iban Sarawak Rangers.

Bala Iban ti bisi deka masuk soldadu Sarawak Rangers bisi ke tuai umur, bisi ke biak apin chukup umur. Betanchut pandak bepetik-petik kamah gasakka getah pera. Bisi ke bekenaka ngepan Iban nunjukka diri kering ngambi ke ulih diterima nyadi soldadu. Bisi ke ngemai ati ti gaga ngarap ke ulih diterima nyadi soldadu sereta bemacham-macham ulah agi.

Pengawa keterubah nya, bala Iban tu tadi dibagi ngagai tugung raban ti betuaika tuai rumah sida iya empu. Dalam awak nya mega sida ke enda patut diterima nyadi soldadu baka sida ke tuai umur sereta iya ke agi biak dikeluarka ari raban nya. Udah nya sida ke tinggal diberi jaku tanyasaut sereta diuji pemintar ba mua tuai sida iya empu. Sida ke mujur tu tadi diperesa pengerai tubuh ulih lutor soldadu. Maya tu meh aku tu tadi kiruh bekalih ke jaku tanyasaut lutor ari jaku Ribai ngagai jaku Iban. Mayuh sida tu tadi enda mujur ba peresa pengerai tubuh ti bisi manggai ngagai 1/3 ari bala Iban ke bisi datai.

Penatai bala Iban ke deka minta nyadi soldadu tu bisi manggai ngagai beratus ratus iku ba siti siti endur. Nyadi hari ke diambi maya pengawa bepilih tu suah endar manggai ngagai dua hari berunggu. Sida ke udah mujur be peresa lutor ke agi tinggal tu di diuji enggau pemandai nyidi utai ba babas.  Tiap iku sida tu tadi ditejuka ba babas lalu diasuh nyidi bekau ke udah digaga dulu agi ulih bala soldadu. Pengawa tu endang nguji sida iya amat ngambika urang ke patut bulih aja diambi lalu diterima nyadi raban Iban soldadu Sarawak Rangers.

Lebuh bepilihka soldadu tu tadi, ukai semina kitai Iban ke nemu pengawa nyidi ba babas aja dipilih. Sekeda sida tu ke bisi ngembuan pemandai ba sekula bisi mega dipilih nyadi soldadu ngambika tau ngereja pengawa bukai baka nyadi regimental signallers (nyaga tauka megai radio soldadu), clerk (kerani), education instructors (pengajar soldadu) ,motor transport (mutarka perengka pengangkut soldadu), storemen (nyaga setor) sereta mayuh bengkah macham pengawa.

Maya raban kami berekrut ke urang di Kuching kena bulan April 1961, bisi siku kitai Iban iyanya Edmund Abitt anak Bedindang ari Betong dipilih masuk nyadi soldadu laban deka dipadu nyadi education instructor soldadu. Sebedau iya nyadi soldadu, iya mangku pengawa ba Opis Radio Sarawak. Capt. Mike Bolton enggau aku lebuh maya nya nurun ngagai Opis Radio Sarawak laban deka ngemai lalu ngambi sereta nerima Edmund Abitt tu tadi nyadi soldadu. Iya pan enda berunding panjai lalu beguai badu gawa ba opis nya laban kelalu gaga diterima nyadi raban Iban soldadu Sarawak Rangers.

Gambar atas ngayanka Edmund Abitt anak Bedindang begambar ngemelakangka flat maried quarters ke bisi ngayanka tangga ari sepiak kanan gambar. Ari sepiak kiba gambar nya mega bisi ngayan ke rumah setor endur engkah perengka-pererengka kena nimbak ba rifle range enggau perengka bukai agi. Gambar tu di ambi ba Baird Camp, Ulu Tiram urung tahun 1961. Urung tahun nya mega, iya tu tadi dianjung belajar ke pengawa education instructor ba Royal Army Education Corps di Gilman Barracks, Clementi Road, Singapore pengalama enam bulan. Aku ke bisi ngembuan lesen bebai ke perengka pengangkut soldadu suah mega beanjung ngambi bala soldadu ke bekursus di Singapore.

Kelimpah ari Edmund Abitt tu, sekeda bala bukai ke dikingatka aku nama dipilih masuk nyadi raban soldadu Iban Sarawak Rangers tahun nya mega iyanya Bandi anak Apat ari Selepong, Legan anak Pengulu Naruk, sereta enggau Bakit anak Jintau. Seduai tu ari Skrang. Bisi lebih 30 iku bala Iban dipilih masuk nyadi soldadu Sarawak Rangers tahun nya.