Pengingat Lama ari Warrant Officer (WO II) Tom anak Dap - Cherita 19

Palan endur alai serdadu tauka kem serdadu endang sigi bisi ngebuan rumah endur alai serdadu sereta anak bini sida iya diau. Ba Baird Camp Ulu Tiram, blok endur alai serdadu ke bisi anak bini diau baru tembu digaga urung hujung tahun 1960. Gambar dibaruh tu mandangka kuarters tauka Flat Married Quarters endur alai serdadu ke bisi anak bini diau ba Baird Camp Ulu Tiram.

Kuartes tu tembu hujung tahun 1960. Maya kami pindah kitu pun tahun 1960 (Cherita 12), kuarters tu benung digaga. Maya ke nganti kuarters tu tembu, bala serdadu ke udah bebini diau ba berek papan lalu panking disapat enggau papan sereta disediaka tempat berapi, bilik mandi enggau rumah agu.

Kelimpah ari ngayan ke Captain Peter Marr, gambar atas mega bisi mandangka tong sampah ti digaga ari aluminium. Tiap iti pintu disediaka tong sampah bansa tu.

Kuarters tu  di gaga enggau penyampau 3 iti blok (2 blok mit, siti blok besai) . Siti blok bisi 12 pintu, 6 pintu ba tingkat baruh lalu 6 pintu agi ba tingkat atas. Siti pintu bisi bilik besai, dua bilik tinduk, tempat berapi, bilik mandi enggau bilik agu. Nyadi penyampau semua pintu iya nya bisi 36 pintu.Tangga endur alai nurun tauka niki ke tingkat atas digaga ba hujung blok.

Gaya pendiau blok ba tingkat atas baka ke dipandang ba gambar atas tu. Di hujung sekali ba gambarnya bisi ngayan ke lalau kayu endur alai bepegai. Ba lalau nya meh endur alai tangga digaga.

 

 

Tiap iti unit bilik mega bisi disediaka endur alai ngeredai gari ti didirika ba mua blok baka ke dipandang ba gambar atas.

Nama sida ti mai bini anak diau ba Flat Married Quarters baka ke dirintai ba baruh tu. Sekeda ari sida nya diau kenyau ari tahun 1960 ngagai tahun 1963. Bisi ari sida tu kala belajarka pengawa serdadu di menua tasik lebuh ti agi dalam Sarawak Rangers (Far East Landa Forces).

 1. CSM Ningkan anak Kasau

 2. C/Sgt Jimba anak Layang, B.E.M
     (Kala kursus di Hong Hong belajar bebai ke kuda  tauka dikumbai Muleteer)
     Cherita 12

 3. Sgt Malang anak Alu
     (Kala kursus di Australia belajar ke pengawa serdadu tauka dikumbai Drill & Duties)

 4. Sgt  Sengalang anak Unyang
     (Kala kursus di UK belajar ke pengawa serdadu tauka dikumbai Drill & Duties)

 5. Sgt Ambau anak Gerasi

 6. Sgt David anak Jaun
     (Tuai Kerani tauka Chief Clerk)

 7. Cpl Empati anak Kelabu
     (Kerani Gaji tauka Pay Clerk)

 8. Cpl Stewart anak Kari
     (Megai radio serdadu tauka Signaller)

 9. Pte Manja anak Kendawang
     (Driber motor serdadu tauka Motor Transport)

10. Cpl Gasah
      (Kala kursus di UK belajar nyepu kesuling tauka dikumbai Bag Piper)

11. Pte Punjab
      (Kala kursus di Hong Kong belajar ngaga kasut kuda tau ke Pony Cobbler)
      Siku-iku ari raban Land Dayak ke bisi ba Sarawak Rangers maya nya suba

12. Pte Galang
      (Tukang masak tauka Chef)

13. Pte Rega
      (Tukang masak tauka Chef)

14. Cpl Meling anak Kulong
      (Mai ukui penyidi tauka Tracking Dog Handler)

15. Pte Dugu

16. Pte Dana

17. Pte Mikai

18. Pte Banyung

19. Pte Jangong

Agi bisi mayuh bala Iban Sarawak Rangers mai bini anak diau ba Flat Married Quarters tang nama enda ingat agi. Pangkat ti ba pun nama sida nya endang pangkat ti diberi serdadu British lebuh ti agi ba Sarawak Rangers.