Pengingat Lama ari Warrant Officer (WO II) Tom anak Dap - Cherita 17

Dewan makai ba Baird Camp Ulu Tiram digaga ari papan sereta ngena atap asbestos cement. Daun penjan dewan makai pan digaga ari papan. Daun penjan tu dibuka tau ke disilak lalu ditungkat ngena kayu baka ke dipandang ba gambar di baruh tu. Gambar ke dudi sekali bisi ngayanka kayu ti nyadi tungkat penjan dipeda ari dalam dewan.

Gambar terubah tu ngayanka dewan makai ba belakang sekali. Ba mua dewan makai tu bisi papan kelai Sarawak Rangers. Lambang Sarawak Rangers tu udah ditusi aku ba Cherita 14. Ba gambar tu aku begulai enggau David anak Jaun sepiak kanan aku serta Wilfred Busu sepiak kiba aku. Gambar tu diambi urung tahun 1961.

Ari Kiba : David anak Jaun, Tom anak Dap,  Wilfred Busu anak Minggat

Ngimbai dewan makai ba Baird Camp Ulu Tiram tahun 1961.

Bejantil enggau dewan makai tu iya nya kantin NAAFI. NAAFI tu jaku pandak datai ari jaku asal iya nya Navy, Army & Air Force Institutes. NAAFI tu ditumbuh ulih Perintah British kena serdadu British alai bebelika perengka ke dikena serdadu sereta bala bini enggau anak sida iya. NAAFI mega bisi bejalaika servis baka bar, kedai makai sereta ai irup, kedai tau ke supermarket (nyual gari, kasut, perengka elektrik) serta mayuh macham pengawa dagang bukai.

Maya nadai pengawa bisi ga bala kami duduk ba kantin NAAFI tu bebelika ai irup kena merindang ati betanyaka rita pangan diri. Maya nya ai bir (beer) sebutul baru ke 65 sen aja. Enti dibai ke rumah tambah sepuluh sen rega butul. Tambah mega utai ke dijual ba NAAFI tu endang sigi murah laban nadai cukai ari perintah.

Gambar ba baruh tu ngayanka bala kami ke benung duduk berandau ngirup ai ke dibeli ari kantin NAAFI.

Gambar di atas bisi ngayan ke Gerasi (Pa Gerasi) kitai Iban ari Kapit, bejam tangan enda bebaju ngemelakang kamera. Lumor tiga ari kiba iya nya Wilfred Busu, udahnya aku. Gerasi tu serdadu Iban ke pemadu tuai maya nya lalu dipebasaka kami enggau ngumbai iya Pa (Apai) Gerasi.

Gaya penjan ke ditusui aku ba pun cherita tadi ulih dipeda kita ba gambar ke dudi tu. Kayu ke singit nya nyadi ke sukung daun penjan nya.