Pengingat Lama ari Warrant Officer (WO II) Tom anak Dap - Cherita 20

Ba Baird Camp Ulu Tiram, bisi siti rumah sekula digaga kena bala anak raban serdadu Iban Sarawak Rangers belajar. Rumah sekula tu tembu digaga hujung tahun 1960 sama maya Flat Married Quarters tembu. Rumah sekula tu berengkah dikena ari tahun 1960 ngagai 1963.  Pengajar Perpetua Lika anak Irok tauka Indai Jonathan tauka bini Chif Clerk David anak Jaun bisi kala ngajar ba sekula tu berengkah bulan Jun 1962.

Pendiau kelas endur alai anak raban serdadu Iban Sarawak Rangers belajar baka ke dipandang ba gambar atas. Bisi lebih 10 iku anak raban serdadu Iban Sarawak Rangers belajar ba sekula tu. Enam iku ke diingat aku bisi kala besukula ditu iyanya Sudan anak Jimba,  Sudin anak Manja sereta Ngalih anak Manja, Jimah anak Meling, Johnson anak Meling sereta Galau anak Meling. 

Begulai enggau Indai Jonathan ngajar ba sekula tu iyanya bini Capt. Maycok ti dulu agi ngajar ba sekula nya. Capt. Maycok tu pegawai Sarawak Rangers bansa Ribai ari England. Pengajar indu tu  anak manager rubber estate ba Ulu Tiram bansa Ribai  mega endang udah ngajar ba sekula tu sebedau jadi enggau Capt. Maycok. Nama indu tu aku enda ingat tang gamal iya baka ke ba gambar ba baruh tu.

Ba gambar nya, ngayanka siku indu ke nyadi pengajar mandangka nama nembiak ke bisi belajar ba sekulanya ngagai Pengarah Sibat ke bediri sepiak kanan Tuan OC, Major D.L. Bruce Merrie, MC. Pengarah Banyang ke bechermin mata bediri sepiak kiba Tuan OC, Major D.L. Bruce Merrie, MC. Kelimpah ari sida tu, ba gambar nya mega bisi ngayanka Sgt. Malang anak Alu lumor satu ari kiba, enggau Lt.  James Tomlow anak Isa lumor tiga ari kiba ngena uniform serdadu bediri ba belakang sekali. Gambar tu diambi ba dalam bilik kelas sekula anak raban serdadu Iban Sarawak Rangers.

Mayuh pemesai ari menua Sarawak lebuh nemuai ngagai Malaya enggau Singapore maya nya, enda tau enda mesti sida tu ngagai Baird Camp Ulu Tiram laban deka ngusung raban serdadu Iban Sarawak Rangers. Aku maya nya nyadi driber kereta serdadu bisi mega berambi anjung raban pemesai ari menua Sarawak baka Tra Zehndra (Dato Seri) maya nemuai ke Singapore. Tra Zenhndra tu maya nya nyadi Members of Council Negeri Sarawak.

Pengarah Sibat enggau Pengarah Banyang bisi kala nemuai ngagai Baird Camp Ulu Tiram kena bulan Februari 1962. Tuan OC, Major D.L. Bruce Merrie, MC lalu mai seduai iya meda pendiau Baird Camp Ulu Tiram. Kelimpah ari ngelawa bilik kelas endur alai anak raban serdadu Iban Sarawak Rangers belajar (baka ke dipandang ba gambar atas), endur alai besukan mega bisi digagai.

Ba gambar atas ngayan ke Tuan OC, Major D.L. Bruce Merrie, MC mandangka bul rugby ngagai Pengarah Banyang. Gambar tu diambi ba setor endur alai engkah perengka lumba enggau main ba Regimental Quarter Master Store.

Mayuh macham perengka sukan bisi disediaka ba Regimental Quarter Master Store baka bats Ping Pong, rackets Badminton, Basketball, Volleyball, Dumbbells bemacham saiz sereta berat enggau mayuh macham utai agi. Rugby, sekeda ari sukan ke pemadu dikerindu raban serdadu Iban Sarawak Rangers. Nadai tusah enti deka ngumpul 15 iku pemain kena numboh siti tim ke kering. Sekeda ari sida tu iyanya Sgt. Jemat, Cpl Imau enggau Pte Galing. Sida tiga tu endang kering, sikar, regas, tegar enggau lanchat lebuh bemain rugby.

Bisi sekali kami bemain rindu ati ngelaban tim New Zealand All Black ba padang Sekula St Andrew Singapore urung tahun 1960. Tim ari New Zealand tu endang sigi tim ke pemadu tebilang maya nya. Bala raban serdadu Iban Sarawak Rangers maya nya endang ransing sereta lantang deka ngalah ke tim ari New Zealand tu. Dua iku pemain kami bakal lebuh bemain. Cpl Imau telih ba pending sepiak kanan. CSM Gon anak Semada luput. Taja pan bala kami bisi bakal, tang pengawa bemain tu tetap diteruska sampai abis. Tang nama meh daya, tim raban serdadu Iban Sarawak Rangers alah maya nya.

Urung tahun ti sama, kami  mega bisi bemain rindu ati ngelaban tim ari Universiti Malaya ba padang sida iya di Dunearn Road, Singapore. Kali tu tim raban serdadu Iban Sarawak Rangers menang.

Ukai tu aja sukan rindu ati ke bisi di atur kenyau ari tahun 1960 ngagai 1963. Mayuh sukan rindu ati kelebih agi sukan rugby bisi diatur ba menua Singapore.