Istana Presiden Cipanas digaga urung tahun 1740 uleh Van Heut ba pemesai tanah lebih ari 25 hektar. Tau mega dikumbai Istana Cipanas, bepalan ba baruh kaki bukit Gede, lebih kurang 103 km ari Jakarta serta 17 km ari pasar Cianjur. Palan tuk dikelingi kebun bungai serta kebun sayur.
Palan tuk suba diempu tuan tanah ari menua Belanda. Maya perintah Gabenor Jenderal Baron van Imhoff, palan tuk nyadi siti ari endur diau rasmi Gabenor Jenderal ti merintah menua Indonesia
Palan Istana Cipanas tuk bisi ngebuan sigi mahligai besai ti bisi 7 igi bilik enggau sport center. Pemesai mahligai tuk iya nya 950 meter persegi. Tiap igi bilik ngebuan perabut kayu, kayu ukir curak Japara serta koleksi lukisan.
Mayoh utai ti narit ati temuai ba palan tuk. Kelimpah ari sejarah istana tu empu, ba dalam mahligai istana bisi art gallery mandang ke koleksi lukisan ari Basuki Abdullah, Dullah Sudjijona serta Lee Man Kong. Bisi siti lukisan ke amat nyelai. Enda ingat nama pelukisnya. Lukisan tuk 8 kaki x 4 kaki pemesai mandang ke jalai alun meraka babas enggau kebun ba kiba enggau kanan. Jalai tuk baka ke nitih ke penunga kitai. Enti kitai ke kiba, jalai tu pan ke kiba. Bakanya mega enti kitai ke kanan, jalai tuk pan nitih kitai ke kanan. Tang sayau lukisan tuk enda uleh digambar laban kamera enda dikemendar bai tama dalam art gallery.
Bisi siti langkau ba dalam palan Istana tuk baka ke dipandang ba gambar di atas. Langkau tuk suba dikena Presiden Indonesia, ia nya Presiden Sukarno kena iya ngarang meri jako ngagai rayat bansa Indonesia lebuh bisi pengawa besai baka ke nyambut hari Indonesia merdeka ari pegai perintah Belanda.
Ba palan tuk mega bisi mata ai panas. Ai tuk, kenu ke tuai temuai manah kena mandi nyuci tubuh tau ke ngubat sakit kulit.
Kena 28 November 2007, admin bisi peluang nemuai ngagai Istana Presiden Cipanas, Istana ke bisi ngebuan sejarah menua Indonesia.
No comments:
Post a Comment