Pengingat Lama ari Warrant Officer (WO II) Tom anak Dap - Cherita 2



Kapal HMS Belfast - Flag Ship.

 

Military exercise iya ke di beri kod nama Bloon Up udah dipejadike ba Tasik China Selatan urung tahun 1961. Mayoh macham kapal perang serta kapal selam bisi enggau exercise tuk. Kapal-kapal ke bisi enggau tuk betuai ke kapal HMS Belfast, kapal Sedadu Tasik British ti ke pemadu besai, tegap serta kering maya jeman nya. Kapal tuk antara kapal ke tebilang maya perang dunia kedua.

Semua kapal ke sama enggau excecise tuk, meleka tumu pagi ari pengkalan Woodland, Singapor nuju palan exercise ba Tasik China Selatan. Pengkalan Woodland tuk, maya nya suba, siti ari pengkalan Sedadu Tasik British (British Naval Base Singapore) ba timur jauh.



Begambar ba atas kapal perang HMS Belfast.



 


Pte. Meling anak Kulong (PW11) (Niang).

  



Bala sedadu Sarawak Rangers atas kapal perang HMS Belfast.

Bediri di mua ari kiba, lumor 2 (meleku ke jari) Pte Tangai (diatu nyadi TR Panjai di Paku Saribas), lumor 3 Pte Minggang (Sgt) (Niang), Lumor 4 Pte. Jembu.
Bediri di belakang ari kanan , lumor 2 L/Cpl Tom anak Dap (PW II).

  

Bala sedadu Sarawak Rangers ti dibai sama serta enggau exercise tuk dibahagi ngagai dua grup. Siti grup, bisi 10 iku sedadu, nepan kapal selam Sedadu Tasik Brirish. Siti grup agi, urung 30 iku sedadu serta 2 iku ukui penyidi serta pemai ukui nepan kapal HMS Belfast.



Lumor 1 ari kiba mua Pte. Ubang (PW 11), Lumor 2 ari kiba Pte. Dugu (Sgt), duduk dibelakang sedadu ribai Pte. Singalang (PW 11).







Pte. Tangai bediri ngimbai bot ti ke dikena berangkut bala sedadu.



Bunyi rerengung didinga datai ari langit. Makin lama, makin inggar, makin semak. Baka bunyi lanyi, tang balat inggar. Kelalu balat ragak. Penantai bunyi ke inggar ari langit tuk tadi nemu nya munyi bilun. Bilun perang munsuh. Lebih hari sa lunsen.

Semua kapal perang iya ke bisi di Tasik China Selatan diserang. Kapal perang HMS Belfast lalu nabur ke bom malas serang tuk nuju ngagai tasik puang. Perang tu nyadi sahari hari. Hari pagi sampai lemai. Udah lemai hari, stesen radio bepalan ba HMS Belfast ngenatai ke rita madah ke semua krew kapal serta sedadu selamat. Nadai siku urang bebadi maya parang ke udah nyadi tuk.

Enggau rita tuk tadi, nya meh ngujung ke excercise ke bisi dipejadi ke sahari nya. Nya meh gaya exercise tuk digaga baka ke amat perang, awak ke semua sedadu bisi ngasai enti sema perang tuk amat nyadi, ngambi ke sida iya besedia.



HMS Belfast dipeda ari bot. Maya tuk, bot benong berangkut bala sedadu Sarawak Rengers ari HMS Belfast ke Pulau Tioman.



Hari ke tiga, bala sedadu Sarawak Rengres diangkut ngena bot mit nuju ngagai Pulau Tioman laban deka ngatur pengawa exercise kediri empu. Pengelama exercise tuk  dipejadike dalam kandang tiga hari. Hari ke tiga ba Pulau Tioman, kapal datai ngambi kami lalu deka dibai pulai ngagai pengkalan Woodland, Singapor. Ba kapal tuk, bala Sarawak Rangers dilayan baka ke pulai beperang.

Nama kebuah? Bala sedadu tuk kelalu balat kamah. Sida iya ke agi ba deck kapal, diasuh nurun diperintah mandi. Gari uniform dianjung ke setor dhobi. Tiap iku kami tuk tadi diberi gari overall kena nganti uniform nya.

Perintah tuk mesti dititih ulih tiap iku sedadu. Kebuah baka nya, laban enti sema amat nyadi perang, nuan tuk tadi udah tecemar gasak ke radioaktif. Jeman tuk, jeman perang dingin antara blok barat ti betuai ke USA enggau blok komunis ti betuai ke USSR. Kedua-dua blok tu tadi endang udah ditemu bala mayoh bisi ngebuan bom nuklear. Nyadi tiap iku sedadu mesti nemu baka ni gaya enti sema perang ngena senyata nuklear tuk amat nyadi.

Utai ti ngalit ba ati tuk tadi iya nya, apabila sedadu Iban ngena overall, gamal sida tuk dipeda nyelai tau ke berubah. Sida nadai tekelala ke pangan diri agi. Gamal sida baka ke sama, baka ke enda. Tau saru meda bala Pte. Siku Pte baka gamal Pte sanu. Baka nya mega tau saru meda bala Sargent. Siku Sargent baka gamal Sargent sanu. Utai ke nyadi tuk, agi mengkang diingat serta dikenang belama. Ngarap ke bala ke sama enggau exercise tuk tadi mujur dalam semua pengawa.



Sedadu Tasik British ngemelakang ke kapal HMS Belfast.



HMS Belfast diatu udah nadai agi dikena Sedadu Tasik British. Jam kediatu, kapal tuk udah dijadi ke muzium, dipandang ngagai bala mayoh ba Batang Thames (River Thames) enda jauh ari Jembatan Menara (Tower Bridge) ba London, England.

(Semua gambar ke dipandang ba atas diambi ngena kamera PW II Tom ak Dap, urung tahun 1961 maya exercise Bloon Up tuk dipejadike.)