Trip ke Kota Batu, Jawa Timur, Indonesia - Tusun 2

Tampung ari Tusun 1

Hari ke terubah 12 September 2011 jam 10.00 pagi

Pusat Wisata Lumpur Lapindo

Pejalai kami ngagai Kota Batu bisi datai ngagai tiga jam enti sema machet (jalai sekut ketegal mayuh motakar ba atas jalai alun) taja pan penyauh ari Surabaya kurang lebih 120 km aja.

Palan keterubah endur alai ngetu tau ke first check point kami iya nya Lapindo iyanya endur alai banjr tanah lucak ke angat.

Enti kita kala meda tv tau ke internet tentu kita takut meda utai ke nyelai nyadi ba menua tu. Tu meh utai ke pemadu nyelai udah dipeda enggau mata diri empu. Banjir tanah lucak tu udah nenggelamke 16 buah menua ari 3 genturung (kacamatan) ngujung ke mensia ke diau dia angkat pindah ngagai endur bukai ke tegal rumah sereta umai sida iya rusak. Utai tu nyadi kenyau ari 26 Mei 2006. Kenu ke sida ke diau ditu, utai tu nyadi berengkah ari pengawa carigali minyak sereta gas. Utai ke pansut ukai minyak tau ke gas, tang tanah lucak chelum ti angat ke pansut ari perut tanah. Pengerugi sida tu lalu ditanggung kompani ke ngerja pengawa carigali tu tadi lalu dibayar pampas kena sida iya ngepun ke pengidup baru ba menua bukai.

Tanah lucak tu enda ngetu pansut lalu majak tinggi. Enti kita deka meda tanah lucak tu, kita deka niki ngena tangga ke bisi disediaka. Kena nyekat lumpur tu ngerekai ngagai endur bukai, tekat baka tembok besai digaga ari batu baka ke dipandang ba baruh tu.

Tanah lucak tu enda ngetu pansut. Enti kita meda ba gambar ke dirintai ba baruh tu, bisi kita meda asap putih dibekang sekali. Arinya tanah lucak tu pansut.

Tanah tu nadai ulih dikena bumai. Enda nemu nama utai ulih ditanam ba tanah lucak tu tau ke utai ke ulih digaga ari tanah tu.

Peda kita gambar ba baruh tu, suba menua tu sama bela enggau jalai alun nya tang diatu menua tu nyi majak tinggi ketegal tanah lucak ke pansut ari perut tanah. Diatu tanah lucak tu udah manggai peninggi kurang lebih 30 meter ari jalai alun.

Kurang lebih bisi setengah jam kami di atas meda fenomena tanah lucak tu, kami pen nurun lalu nerus ke pejalai kami ke Kota Batu.