Kelimpah ari bekawad, belatih nimbak sereta nyadi pengajar, aku mega mangku pengawa nyadi driber kereta serdadu. Aku belajar mai kereta serdadu tu ba Paroi Camp, Port Dickson (peda Cherita 9) maya baru nyadi serdadu . Maya ba Baird Camp, Ulu Tiram, aku mega suah endar mai kereta serdadu ba menoa Johore sereta Singapore, kelebih agi ba pasar besar Johore Baharu enggau Singapore. Semua jalai besai ke di pansa ba Johore enggau Singapore ditemu aku magang maya nya.
Di baruh tu ngayan ke Land Rover ti nyadi kereta serdadu ke dibai aku maya ba Baird Camp, Ulu Tiram. Gambar tu diambi urung tahun 1961 begulai enggau Lt. Tomlow anak Isa.
Begambar begulai enggau Lt. James Tomlow anak Isa (Col (Rtd)) ba Baird Camp, Ulu Tiram berimbai Land Rover ke suah di bai aku. Rumah dibelakang kami nya Setor Logistik endur engkah perangka ke dikena serdadu. Gambar tu diambi urung tahun 1961.
James Tomlow anak Isa diambi nyadi serdadu Sarawak Rangers urung bulan Mac 1960 lalu diberi Governor's Commision sereta diberi pangkat Second Lieutenant. Iya lalu dianjung ngagai England (MONS) belatih ke pengawa serdadu pengalama enam bulan. Iya mega anak Sarawak bansa Iban ke dua mangku pengawa Administrative Officer leboh maya nya. Terubah kitai Iban mangku pengawa Administrative Officer iya nya Lt. Francis Bucking.
No comments:
Post a Comment