Trip ke Kota Batu, Jawa Timur, Indonesia - Tusun 6

Tampung ari Tusun 5

Hari ke tiga 14 September 2011 jam 9.00 pagi Batu, Malang, Jawa Timur, Indonesia

Lemai tu tadi, polis ari Batu Malang Jawa Timur madah ke sida iya begulai enggau serdadu TNI bisi bebalas tembak enggau raban pengganas ke betuai ke Dr. Azahari sereta Noor Din Mat Top ba genturung menua Batu ba Jalai Flamboyan enda jauh ari palan rekreasi Songgoriti, Batu, Malang, Jawa Timur. Kelimpah ari bebalas tembak, raban serdadu mega bisi ngena granat kena ngebom endur alai pengganas tu belalai.

Villa ba jalai Flamboyan tu dipelaba diuan tujuh iku raban penyelawai nyengkaum Dr. Azahari sereta Noor Din Mat Top. Iya kediatu dua iku penyelawai udah dibunuh serdadu sereta polis Indonesia.

Carut ke dibacha kita ba atas nya nyadi kena 9 November 2005 ti ngujungke seput Dr. Azahari lesi bebadi.

Enam tahun udahnya, raban kami dibai bejalai meda rampa menua tu. Tu meh palan keterubah diabas raban kami ti dibai tuai rumah Indonesia. Rumah tu mega lalu dijadike antara palan ti ulih narit ati ba genturung menua Kota Wisata Batu.

Bala pemacha, kitai sama nemu, Dr. Azahari tu  siku ari raban pengganas ke pemadu digiga perintah Indonesia laban iya tu tadi bisi bekaul enggau raban pengganas antarabangsa ti ngebom Paddys Cafe ba Bali kena 12 oktober 2002 ti ngujung ke 202 temuai lesi bebadi. Pia mega pengawa ngebom Hotel JW Marriot ba Jakarta 5 Ogos 2003 ti munuh 14 iku urang.

 

Iya mega digiga  perintah Indonesia ketegal pengawa ngebom Kedutaan Besai Australia ba Jakarta kena 9 September 2004 ti ngujung ke 12 iku urang lesi bebadi. Kes ke penudi sekali iya nya sama enggau pengganas bukai ngebom Bali II kena 1 Oktober 2005 ti munuh 23 iku orang nyengkaum tiga pengebom munoh diri. Iya tu tadi urang ke pandai ti nemu ngaga bom ti dikena pengganas ngebom semua utai ke disebut tu tadi.

Tu meh gaya villa Lumor 7, Jalai Flamboyan, Kota Batu, Malang ke diatu. Gambar ke dipandang ba atas ngayan ke penama rumah tu ari jalai alun. Gambar ba baruh tu iyanya gambar ba dalam rumah tu.

Bekau tembak enggau bom agi ulih dipeda kitai ba dinding sereta geladak enggau perabung rumah tu.

Kena nanda ke diri udah datai ba menua tu, admin sempat mega begambar ba tanda nama jalai baka ke dipandang ba baruh tu. Rumah Dr. Azahari iyanya rumah ke perabong enda beratap baka ke dirumpang ba belakang admin.