Pengingat Lama ari Warrant Officer (WO II) Tom anak Dap - Cherita 15

Sarawak Rangers Uniform

Aku nyadi serdadu suba berengkah ari 7 Ogos 1959 (peda Cherita 9). Maya nya serdadu Sarawak Rangers agi dikumbai siti Kompeni serdadu penyidi. Berengkah ari 1 April 1960, serdadu Sarawak Rangers nyadi siti Unit ti dikumbai Special Tracking Unit ti dipegai sereta dikuasa oleh serdadu British (peda Cherita 13). Aku maya nya pan ngambi sain baru begulai enggau Unit ke baru ditumbuh nya.

Dua iti gambar di baruh tu diambi dalam tahun 1959 sereta dalam tahun 1961.

900928 Pte Tom anak Dap SWK R - Tahun 1959

MYA 18195047 Cpl Tom anak Dap - Tahun 1961

Kelimpah ari kelai pangkat ba lengan baju, utai bukai ke enda sebaka nya iya nya formation sign. Formation sign ba gambar terubah nya mandangka bintang ke nyadi tanda Federation. Maya nya serdadu Sarawak Rangers agi dikumbai siti Kompeni. Maya Kompeni Sarawak Rangers tu diketu lalu diganti enggau siti Unit Sarawak Rangers dalam tahun 1960, formation sign ba lengan baju diganti enggau kelai kukri, lungga pandak Gurkha ke pemadu tajam (peda Cherita 14) baka ke dipeda kita ba sepiak kanan ba gambar dua ba atas.Cap Badge ke ba tangguinya digaga ari tembaga beselap ke kain bechura kuning, chelum enggau mansau.

Gari uniform Sarawak Rangers Federation Unit ba gambar terubah ba atas dikena aku berengkah aku masuk serdadu kenyau ari 7 Ogos 1959 ngagai 31 Mac 1960. Udah nya diganti enggau gari uniform Sarawak Rangers (Far East Land Forces) Unit berengkah ari 1 April 1960 ngagai 15 September 1963. Sarawak Rangers (Far East Land Forces) Unit  tu dipegai ulih Briged Ke-99 di baruh Divisyen Ke-17 Gurkha ti bepalan ba Rasah Camp Seremban, Nengeri Sembilan.