Trip ke Kota Batu, Jawa Timur, Indonesia - Tusun 7

Tampung ari Tusun 5

Hari ke tiga 14 September 2011 jam 10.30 pagi Wana Wisata Coban Rondo

Wana Wisata Coban Rondo



Dulu menya bisi siku indu benama Dewi Anjarwati ari Gunung Kawi nikah enggau Raden Baron Kusuma ari Gunung Anjasmoro. Sepengudah pengawa melah pinang manggai 36 hari (selapan dalam jako jawa) Dewi Anjarwati ngemai laki iya nemuai ngagai Gunung Anjasmoro asal menua laki iya. Urang tuai Dewi Anjarwati nagang seduai iya mindah laban pengawa nemuai tu mali enti pengawa nikah baru manggai selapan. Tang seduai tu keran deka bejalai. Seduai pan lalu mupok berangkat ninggal ke Gunung Kawi enda ngira nama utai uleh nganu seduai iya. Maya ba rantau jalai, seduai iya tekenyit meda siku urang ti benama Joko Lelono nadai nemu penatai ari ni. Joko Lelono tu rindu amai meda pemajik Dewi Anjarwati lalu deka ngemai indu tu nyadi enggau iya. Belaya meh Raden Baron Kusuma enggau Joko Lelono. Raden Baron Kusuma bepesan ngagai bini iya belalai ba palan ke bisi wong (Coban dalam jaku Jawa). Raden Baron Kusuma enggau Joko Lelono lalu beperang ti ngujung ke seduai iya sama-sama lesi bebadi. Nama meh penyadi Dewi Anjarwati. Iya pan nyadi balu tau ka janda (Rondo dalam jaku Jawa). Batu besai ba baruh wong nya endur alai Dewi Anjarwati duduk nganti penatai laki iya tang enda ga laki iya pulai. Palan tu ke alai Dewi Anjarwati belalai lalu dikumbai bala mayuh enggau nama Coban Rondo, ngangkat ke utai ke udah nyadi ba pengidup Dewi Anjarwati.

Wong Coban Rondo tu bepalan ba Gunung Panderman kurang lebih 32 km ke Barat ari Pasar Malang, Jawa Timur, Indonesia. Peninggi wong tu iyanya 84 meter tau ke 276 kaki. Menua tu chelap (22˚C) ketegal ke peninggi bisi manggai ngagai 1721 meter tau ke 5 646 kaki ari tikas purata ai tasik sebaka baka menua Bareo di Sarawak.

Mayuh macham fasaliti ke disediake baka palan endur alai nembiak main, palan endur alai belangkau (camping), jambatan mit ke meraka sungai enggau trek bejalai kaki.

Utai bukai ke bisi ditu iyanya jelu babas baka kera, mendarat, burung sereta mayuh macham jelu bisi mega ngayan ke diri laban deka minta pemakai ari kitai.

 

Bunyi ai sungai rarat tau mai hati kitai chelap ti ngujung ke kitai rindu meda rampa menua tu.

Endur alai urang bedagang nyual ai enggau pemakai sereta souvenir, bisi mega disediake.

Bisi nemuai kitu kena 14 September 2011 maya enggau delegasi Malaysia baun ke sempadan antara menua kitai enggau Indonesia ke bisi di atur ba Kota Batu, Jawa Timur, Indonesia berengkah ari 13 ngagai 15 September 2011.